Yuxarı

Azərbaycanda geni dəyişdirilmiş məhsulların idxalı, istehsalı və satışı qadağan edilib

Milli Məclis bununla bağlı Cinayət Məcəlləsinə və İnzibati Xətalar Məcəlləsinə əlavə və dəyişikliklər edib

Bakı. 28 aprel. REPORT.AZ/ Azərbaycanda genetik modifikasiya olunmuş bitkilərdən, yaxud gen mühəndisliyi metodu ilə yaradılmış bitki materiallarından istifadə edərək yeyinti məhsulu istehsal, idxal edən və satan şəxslər azadlıqdan məhrum ediləcəklər. "Report" xəbər verir ki, Milli Məclisin aprelin 28-də keçirilən iclasında bununla bağlı Cinayət Məcəlləsinə və İnzibati Xətalar Məcəlləsinə əlavə və dəyişikliklər edilib. 

Dəyişikliyə əsasən, elmi tədqiqat, sınaq və sərgilərdə nümayiş etdirilmək məqsədləri üçün nəzərdə tutulmayan genetik modifikasiya olunmuş bitkiləri, yaxud müasir biotexnoloji və gen mühəndisliyi metodları ilə yaradılmış kənd təsərrüfatı bitki materiallarını və ya genetik modifikasiya olunmuş bitkilərin genetik materiallarından istifadə edilərək istehsal olunan yeyinti məhsullarını bilə-bilə idxal edən və satanlar, bu əməllər xeyli miqdarda törədildikdə 3 000 manatdan 5 000 manatadək miqdarda cərimə və ya iki ilədək azadlıqdan məhrumetmə cəzaları ilə cəzalandırılacaqlar. Belə yeyinti məhsullarını istehsal edənlər 4 000 manatdan 6 000 manatadək cərimələnəcək, yaxud 3 ilədək azadlıqdan məhrum ediləcəklər.

Qeyd edilən əməllər (idxal etmə, satma və istehsal etmə) külli miqdarda törədildikdə 7 000 manatdan 9 000 manata kimi cərimə tətbiqi olunacaq, yaxud belə şəxslər 2 ildən 5 ilədək azadlıqdan məhrum ediləcəklər. Sadalanan əməllər bu cinayətə görə məhkum edilmiş şəxs tərəfindən törədildikdə isə onlar 3 ildən 7 ilədək azadlıqdan məhrum olunacaqlar.

Müzakirələrdən sonra əlavə və dəyişikliklər qəbul edilib.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi