Səfir: "İsrail hər zaman Azərbaycanın ərazi bütövlüyünü dəstəkləyib"

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva İsrailin Azərbaycan Respublikasındakı Fövqəladə və səlahiyyətli Səfiri Corc Diki qəbul edib.

Ombudsman Aparatından "Report"a verilən məlumata görə, müvəkkil Azərbaycan və İsrail arasında qarşılıqlı dostluq və əməkdaşlıq əlaqələrinin yalnız iqtisadi-strateji baxımdan deyil, həm də ənənəvi tarixi mədəni köklərə əsaslandığını, Azərbaycan və İsrail xalqlarının daim tarixin çətin dönəmlərində qarşılıqlı anlaşmaya, tolerantlığa əsaslanan birgə yaşayış nümunəsini bütün dünyaya nümayiş etdirdiklərini bildirib.

Görüş zamanı Müvəkkil Ermənistanın Azərbaycana qarşı apardığı işğalçılıq siyasəti və hərbi təcavüzü nəticəsində kütləvi insan hüquqları pozuntuları barədə məlumat verib. Qeyd edib ki, beynəlxalq hüququn tələblərini heçə sayan Ermənistanın hərbi və siyasi rəhbərliyi Azərbaycanın mülki yaşayış məntəqələrini intensiv olaraq qadağan olunmuş artilleriya silahlarından atəşə tutur. Bunun nəticəsində Azərbaycanın ikinci böyük şəhəri Gəncə başda olmaqla bır sıra şəhər, rayon və kəndlərində çox sayda mülki şəxs qətlə yetirilib yaxud müxtəlif dərəcəli xəsarətlər alıb. Müvəkkil təəssüflə bildirib ki, qətlə yetirilənlər və yaralananlar arasında uşaqların, qadınların və əlilliyi olan şəxslərin olması Ermənistanın 90-cı illərin əvvəllərində olduğu kimi mülki şəxsləri hədəf alan terror fəaliyyətlərini davam etdirdiyini göstərir.

Müvəkkil qeyd edib ki, Ermənistanın məqsədli şəkildə artilleriya atəşinə məruz qoyduğu mülki yaşayış məntəqələri münaqişə zonasından xeyli uzaqda yerləşir. Bu da öz növbəsində, açıq şəkildə Ermənistan siyasi rəhbərliyinin münaqişə ərazisini genişləndirərərək daha çox insan təlafatına yol açmaq, regionda humanitar böhran vəziyyəti yaratmaq məqsədinə xidmət etdiyini bir daha sübut edir.

Müvəkkil bu ilin 27 sentyabr tarixindən Ermənistanın yeni torpaq iddiaları ilə Azərbaycana qarşı başlatdığı hərbi təcavüzü və hərbi təxribatları nəticəsində raket hücümuna məruz qalmış mülki yaşayış məntəqələrinə faktaraşdırıcı missiya fəaliyyəti çərçivəsində baş çəkdiyini, yaralanan mülki şəxslərlə və həlak olanların yaxınları ilə görüşdüyünü bildirib. Qeyd olunub ki, araşdırmalar zamanı toplanan faktoloji materiallar əsasında hazırlanan 4 aralıq hesabat aidiyyəti beynəlxalq qurumlara göndərilib.

Müvəkkil həmçinin bu gün günorta saatlarında Ermənistan silahlı qüvvələri tərəfindən yenidən Bərdə şəhərinin mülki əhalinin sıx hərəkətdə olduğu və ticarət obyektlərinin yerləşdiyi ərazisinə beynəlxalq hüquqla qadağan olunmuş kaset bombalardan zərbələr endirildiyini, nəticədə 20-dən çox mülki şəxsin həlak olduğunu, 60-dan çox şəxsin yaralandığını, mülki infrastruktur obyektlərinə və nəqliyyat vasitələrinə külli miqdarda ziyan dəydiyini səfirin diqqətinə çatdırıb.
Səfir səmimi qəbula görə Müvəkkilə öz təşəkkürünü bildirib və qeyd edib ki, Azərbaycan ilə İsrail arasındakı dostluq əlaqələri dərin tarixi köklərə malikdir. İki ölkə arasında iqtisadi, enerji, təhlükəsizlik və turizm sahəsindəki əlaqələr əlaqələr, eyni zamanda Azərbaycan və İsrail xalqları arasındakı qarşılıqlı münasibətlər də çox yüksək səviyyədədir. C. Dik mülki şəxsləri hədəf alan hərbi hücumların ciddi təəssüf hissi doğurduğunu və vəziyyətlə yaxından tanış olmaq məqsədilə Gəncə və Mingəçevir şəhərlərinə getdiyini, xəsarət alan və mülkləri zərər görən şəxslərlə görüşdüyünü bildirib. Qeyd olunub ki, İsrail dövləti hər zaman Azərbaycanın ərazi bütövlüyünü dəstəklədiyini və bu mövqeyinin dəyişməz olduğunu bildirib.

Müvəkkil maraqlı fikir mübadiləsinə görə səfirə öz dərin minnətdarlığını bildirib, insan hüquqlarının səmərəli müdafiəsi sahəsində hər iki ölkənin Ombudsman qurumları arasında əməkdaşlığın daha da möhkəmləndirilməsinin zəruriliyini qeyd edib.

Görüşdə bir sıra digər məsələlər müzakirə olunub.