Nazir müavini: Rio Konvensiyaları çərçivəsində səyləri birləşdirdikdə daha çox nailiyyət əldə edə bilərik

Rio-Trio Təşəbbüsünün uğuru düşüncələrimizi gerçəyə çevirəcək ortaq öhdəliyimizdən asılıdır.

"Report" xəbər verir ki, bunu ekologiya və təbii sərvətlər nazirinin müavini Umayra Tağıyeva COP29 çərçivəsində baş tutan "Rio-Trio təşəbbüsü: Davamlı ekosistemlər üçün konvensiyalararası biliklərin artırılması" adlı tədbirdə deyib.

O qeyd edib ki, Rio-Trio Təşəbbüsü sadəcə tərəfdaşlıqdan daha artıqdır: "Bu kollektiv fəaliyyətin rəmzidir. Uğur qazanmaq üçün biz təcrid olunmuş şəkildə deyil, birgə həllər tapmaq üçün Konvensiyalar üzrə səylərimizi birləşdirməliyik.

Rio Konvensiyaları çərçivəsində birgə işləmək göstərir ki, səylərimizi birləşdirdikdə daha çox nailiyyət əldə edə bilərik".

Nazir müavini əlavə edib ki, NDC-lər, NAP-lar və Milli Biomüxtəliflik Strategiyaları və Fəaliyyət Planlarının inteqrasiyası kimi birgə təşəbbüslər Dayanıqlı İnkişaf Gündəliyində çoxsaylı məqsədlərə cavab verən faydalar təmin edə bilər.

"Biz hər Konvensiyanın özünəməxsus roluna hörmət edən, eyni zamanda, rahat inteqrasiyaya imkan verən məlumat mübadiləsi üsulları yaratmalıyıq. Bu platformalar iqlim, biomüxtəliflik və torpaqların bərpası sahəsində irəliləyişi izləmək üçün aydın, ortaq meyarlar və göstəricilərə malik olmalıdır.

Konvensiyalar üzrə metodlarımızı uyğunlaşdırmaqla biz təkrarlanmanın qarşısını ala, hesabatı sadələşdirə və səylərimizin bir-birini dəstəklədiyinə əmin ola bilərik".

U.Tağıyeva qeyd edib ki, bu gün problemlər çox olsa da, fəaliyyət göstərmək imkanı da bir o qədər genişdir:

"Bilik mübadiləsi üsullarımızı harmonikləşdirməklə, daha yaxşı siyasət formalaşdıra, daha güclü hesabatlılıq və davamlı tərəfdaşlıqlar yarada bilərik".

Qeyd edək ki, Rio-Trio təşəbbüsünün məqsədi Azərbaycandan BMT-nin İqlim Dəyişmələri üzrə Çərçivə Konvensiyası, Kolumbiyadan BMT-nin Bioloji müxtəliflik haqqında Konvensiyası və Səudiyyə Ərəbistanı Krallığından BMT-nin Səhralaşma ilə mübarizə haqqında Konvensiyasını təmsil edən üç yeni COP sədrliyinin səylərini koordinasiya etməklə, qlobal dayanıqlılıq təşəbbüslərini gücləndirməkdir.