Firdaus Ussidhum: Dünyada iqlim fəaliyyətləri üçün vahid idarəetmə modeli hazırlanmalıdır

Beynəlxalq ictimaiyyət iqlim fəaliyyətləri üçün vahid idarəetmə modeli hazırlamalıdır.

“Report” xəbər verir ki, bunu "Birləşmiş Şəhərlər və Yerli Hakimiyyətlər" Təşkilatının baş katibinin xüsusi müşaviri Firdaus Ussidhum Bakıda BMT-nin İqlim Dəyişmələri üzrə Tərəflərin İlkin Konfransı (Pre-COP29) çərçivəsində keçirilən panel sessiyada deyib.

O bildirib ki, beynəlxalq təşkilatlar çərçivəsində işləməklə yanaşı, regional səviyyədə fəaliyyətləri gücləndirmək lazımdır: “İqlim fəaliyyətləri məsələlərində beynəlxalq ictimaiyyətlə regional idarəetmə arasında tarazlıq çox vacibdir. Bu, uğurun əsas açarıdır”.

F.Ussidhum tərəfləri iqlim dəyişikliyi ilə mübarizədə təcili tədbirlər görməyə çağırıb: "Boş dayanmağın qiyməti insan tələfatı və dəyər baxımından həddindən artıq yüksək olur".

O, həmçinin vurğulayıb ki, İtki və Zərər Fondu uyğunlaşdırılma və iqlim fəaliyyətlərinin həyata keçirilməsinə yardımda əsas sütun olmalıdır.