Almaniyalı nazir: Yeni binalar iqlimə neytral tikinti materialları ilə inşa edilməlidir

Yeni binalar iqlimə neytral tikinti materialları ilə inşa edilməlidir.

"Report" xəbər verir ki, bunu Almaniyanın iqtisadiyyat və iqlim mühafizəsi nazirinin ölkə parlamentindəki stats-katibi Ştefan Ventsel COP29 çərçivəsində "Yaşıl tikinti, binalarda enerji səmərəliliyi və şəhərlərdə iqlimə davamlılıq" mövzusunda keçirilən nazirlərin görüşündə çıxışı zamanı deyib.

O bildirib ki, tikinti materiallarının dövrü və təkrar emalı da çox vacibdir:

"Dəyişikliklər təkcə iqlimimiz üçün deyil, həm də sosial və iqtisadi zərurətdir. Tez-tez eşidirik ki, enerji səmərəli təmir ev sahibləri üçün çox bahalıdır və kirayə xərclərinin artmasına səbəb olur. Ona görə də iqlimə uyğun mənzillərin əlçatan olmasını təmin etməliyik".

Nazir qeyd edib ki, vaxtında iqlimə uyğun tikilməyən və ya təmir edilməyən binaların atılmış aktivlərə çevrilməsi riski var: "Həmçinin bina sektorunun transformasiyası iş yerlərinin yaradılması üçün əhəmiyyətli potensiala malikdir".

"Bərpa olunan enerji mənbələri ilə işləyə bilən texnologiyalara, məsələn, istilik nasosları və ya mərkəzləşdirilmiş isitmə-soyutma sistemlərinə keçid etmək üçün fossil yanacaqla işləyən isitmə və soyutma sistemləri dəyişdirilməlidir.

Yeni və mövcud binaların enerji səmərəliliyi artırılmalıdır. Onlar sıfır və ya demək olar ki, sıfır emissiyalı binalara çevrilməlidir. Bu səylər həmçinin fossil yanacaqlardan asılılığımızı azaltmağa və bərpa olunan enerji sistemimizin dayanıqlılığını artırmağa kömək edəcək", - S.Venzel əlavə edib.