ADB ABŞ və Yaponiyanın suveren zəmanətləri əsasında iqlim maliyyələşməsini artırır

Asiya İnkişaf Bankı (ADB) mövcud kreditlərin bir hissəsi üzrə ABŞ və Yaponiya risk sığortasını öz üzərinə götürməyə razılaşdıqdan sonra iqlim dəyişikliyi ilə mübarizə tədbirlərinin maliyyələşdirilməsini 7,2 milyard ABŞ dollarına qədər artıracaq.

“Report” “Reuters”ə istinadən xəbər verir ki, bu, iqlim maliyyələşməsi üzrə dövlət zəmanətlərinin verildiyi ilk tarixi haldır.

ADB-nin yeni strategiyası, xüsusilə inkişaf etməkdə olan ölkələr üçün mövcud maliyyələşmənin həcminin artırılmasına həsr olunmuş Bakıda bu gün işə başlayan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasını (COP29) nəzərə alaraq, digər inkişaf bankları üçün nümunə ola bilər.

Qeyd edək ki, ADB 2019-2030-cu illər üçün iqlim tədbirlərinin maliyyələşdirilməsi üzrə 100 milyard ABŞ dolları məbləğində uzunmüddətli hədəf müəyyən edib. 2023-cü ildə bank 9,8 milyard ABŞ dolları ayırıb.