Türkiyə podratçıları 9 ayda Azərbaycanda 548 milyon dollarlıq iş görüb

Bu ilin yanvar-sentyabr aylarında Türkiyə podratçıları Azərbaycanda ümumi dəyəri 548 milyon ABŞ dolları olan 13 layihə həyata keçirib.

“Report” xəbər verir ki, bu barədə Türkiyə Podratçılar Birliyi məlumat yayıb.

Məlumatda həmçinin deyilir ki, Türkiyə podratçıları 9 ayda ölkə xaricində 167 layihə icra edib ki, bunların da ümumi dəyəri 17,7 milyard dollar təşkil edib. Layihələrin dəyərinə görə ilk 3-lükdə Rusiya (6,9 milyard dollarlıq 7 layihə), İraq (3,1 milyard dollarlıq 12 layihə) və Zambiya (1,3 milyard dollarlıq 1 layihə) qərarlaşıb.

Türklərin 1972-ci ildən bəri dünyada həyata keçirdikləri layihələrin sayı 10 860, ümumi dəyəri 139,7 milyard dollardır. Bu layihələr 129 ölkəni əhatə edib.