Şöbə müdiri: “Yaşıl iqtisadiyyat”a keçidi maliyyələşdirməkdə problem var”

“Yaşıl iqtisadiyyat”a keçidin həm özəl sektorun, həm də dövlət büdcəsi hesabına maliyyələşdirilməsində problemlər mövcuddur.

“Report” xəbər verir ki, bunu İqtisadiyyat Nazirliyinin şöbə müdiri Hüseyn Hüseynov Bakıda “Yeni Nəsil İqtisadiyyat: Çağırışlar və Perspektivlər” mövzusunda keçirilən “3-cü İqtisadi Əməkdaşlıq Təşkilatı Beyin Mərkəzləri Forumu”nda bildirib.

"Odur ki, bu məsələdə beynəlxalq əməkdaşlıq mühüm əhəmiyyət daşıyır. Azərbaycan hökuməti də “yaşıl iqtisadiyyat”a keçidi stimullaşdırmaq üçün öncədən tədbir görməyə başlayıb. 5 milli priorioritet və onun əsasında icra edilən 2022-2026-cı il sosial-iqtisadi inkişaf strategiyası, eləcə də strategiya ilə müəyyən edilmiş hədəflər orta və uzunmüddətli dövrdə “yaşıl trasformasiya”nın reallaşdırılması üçün siyasətin müəyənləşdirilməsində xüsusi əhəmiyyətə malikdir", - deyə o qeyd edib.