Səhiyyə Nazirliyi 3 xəstəxananın təmirinə xərcləyəcəyi məbləği açıqladı

Səhiyyə Nazirliyi Bakı şəhəri Baş Səhiyyə İdarəsinin tabeliyində olan 2 nömrəli Doğum evinin əsaslı təmiri (1), Qəbələ Rayon Mərkəzi Xəstəxanasının tikintisi (2), eləcə də, 2 nömrəli Sumqayıt Şəhər Xəstəxanasının yeni binasının tikintisi (tibbi avadanlıqlarla təchizatı) (3) ilə bağlı elan etdiyi 3 açıq tenderə yekun vurub.

"Report" vahid dövlət satınalmaları portalına istinadən xəbər verir ki, hər 3 tenderin qalibi “Arash Medical Company” QSC-dir.

Qalib şirkətə 5 milyon 559 min manat, 7 milyon 544,7 min manat və 6 milyon 322,7 min manat, ümumilikdə isə 19 milyon 426,4 min manat ödəniləcək.