Rusiyanın Krasnodar vilayəti və Azərbaycan müəssisələri arasında görüş olub

Azərbaycan-Rusiya və Rusiya-Azərbaycan İşgüzar Şuralarının və Rusiyanın Krasnodar vilayətinin rəhbərliyinin dəstəyi ilə region və Azərbaycan müəssisələri arasında onlayn formatda işgüzar görüş keçirilib.

"Report" bu barədə İqtisadiyyat Nazirliyinə istinadən xəbər verir.

Məlumata görə, tədbirdə Azərbaycanda İxracın və İnvestisiyaların Təşviqi Fondu (AZPROMO), Rusiyanın Azərbaycandakı Ticarət Nümayəndəliyi, Rusiya İxrac Mərkəzi, Krasnodar vilayətinin Sənaye siyasəti departamenti və digər təşkilatların nümayəndələrinin ixracın genişləndirilməsi və ticarətin inkişafı istiqamətində dəstək tədbirləri barədə çıxışları dinlənilib.

Sonra Krasnodar və Azərbaycan şirkətlərinin nümayəndələri fəaliyyət istiqamətləri barədə təqdimat ediblər.

Görüşdə Azərbaycanda yaradılmış əlverişli biznes və investisiya mühiti, “Ələt Azad İqtisadi Zonası” layihəsi və investorlar üçün nəzərdə tutulan güzəştlər barədə məlumat verilib.

Tədbir kənd təsərrüfatı, qida məhsulları, qablaşdırma sənayesi və ixtisaslaşdırılmış avadanlıq istehsalı sahələrində fəaliyyət göstərən sahibkarlar arasında ikitərəfli görüşlərlə davam edib.