KOB subyektlərinin layihələrinin maliyyələşdirilməsinə başlanılıb

KOB subyektlərinin layihələrinin maliyyələşdirilməsinə başlanılıb Hər layihənin maliyyələşdirilməsi üçün minimum 14 min, maksimum 20 min manat vəsait ayrılıb
Biznes
496
24 May , 2021 16:33
KOB subyektlərinin layihələrinin maliyyələşdirilməsinə başlanılıb

Azərbaycanda mikro, kiçik və orta sahibkarlıq subyektlərinin təhsil, elm, tədqiqat və dəstək layihələrinin maliyyələşdirilməsinə başlanılıb və ilk müsabiqənin qalibləri ilə müqavilələr imzalanıb.

Bu barədə "Report"a İqtisadiyyat Nazirliyi yanında Kiçik və Orta Biznesin İnkişafı Agentliyindən (KOBİA) bildirilib.

Məlumata görə, müvafiq vəsait müsabiqə qaliblərinin bank hesablarına köçürüləcək.

Bununla bağlı bu gün KOBİA-nın təşkilatçılığı və müsabiqə qaliblərinin iştirakı ilə tədbir keçirilib. Müsabiqə qaliblərini təbrik edən Agentliyin İdarə Heyətinin sədri Orxan Məmmədov qeyd edib ki, KOB subyektlərinin təhsil, elm, tədqiqat və dəstək layihələrinin maliyyələşdirilməsi üçün ilk müsabiqə Nazirlər Kabinetinin 30 sentyabr 2020-ci il tarixli qərarı ilə təsdiq olunmuş Qaydalara əsasən təşkil olunub. O, vurğulayıb ki, ilk müsabiqə olmasına baxmayaraq, sahibkarların marağı böyük olub. Müsabiqəyə 329 layihə təqdim edilib. KOB subyektlərinə aid layihələrin 129-u hüquqi, 193-ü fiziki şəxslərə, ümumilikdə 319-u mikro və 3-ü kiçik sahibkarlıq subyektlərinə məxsusdur. Müsabiqəyə təqdim olunmuş layihələrdən 128-i təhsil, 99-u dəstək, 32-si tədqiqat, 5-i elm, 65-i isə çoxsahəli layihələrdir. Ekspert Komissiyasının kollegial qərarına əsasən, 15 layihənin maliyyələşdirilməsi barədə qərar qəbul olunub. Layihələr yanacağa qənaət, müxtəlif qurğuların və proqram təminatının hazırlanması, təkrar emal, tullantısız istehsal, beynəlxalq sertifikatların və patentlərin alınması, qadınların məşğulluğunun təmin edilməsi istiqamətlərini əhatə edir. Hər layihənin maliyyələşdirilməsi üçün minimum 14 min, maksimum 20 min manat vəsait ayrılıb.

KOB subyektlərinin müsabiqə barədə məlumatlandırılması və layihələrin hazırlanmasına dəstək məqsədilə Agentlik tərəfindən maarifləndirici tədbirlər görülüb, vebinar keçirilib, KOB inkişaf mərkəzləri tərəfindən sahibkarlara məsləhət xidmətləri göstərilib, layihələrin hazırlanması mövzusunda təlimlər təşkil olunub.

Tədbirdə qeyd edilib ki, Agentlik layihələrin davamlı və KOB sektoru üçün faydalı olmasında, eləcə də mexanizmin səmərəli dəstək tədbiri kimi inkişafında maraqlıdır. Agentlik tərəfindən layihələrin icrasına və ödənilən vəsaitin təyinatı üzrə istifadə edilməsinə nəzarət olunacaq. Belə ki, şəffaflığın və hesabatlığın təmin edilməsi məqsədilə monitorinqlər aparılacaq və layihələrin icrası prosesi barədə ictimaiyyət mütəmadi olaraq məlumatlandırılacaqdır.

Bildirilib ki, müsabiqənin qalibləri əlavə dəstək kimi KOBİA-ya müraciət edərək “Startap” şəhadətnaməsi ala bilərlər. “Startap” şəhadətnaməsi müsabiqə qaliblərini 3 il müddətinə innovativ fəaliyyətdən əldə etdikləri gəlirlər üzrə mənfəət və gəlir vergisindən azad edəcəkdir.

Əqli Mülkiyyət Agentliyinin tabeliyində Əqli Mülkiyyət Hüquqlarının Təminatı Mərkəzinin direktoru Nəcəf Quliyev mərkəzin fəaliyyəti barədə məlumat verərək, müsabiqənin qaliblərinin mərkəzin təqdim etdiyi xidmətlərdən də istifadə edə biləcəklərini qeyd edib.

Qeyd: Mikro, kiçik və orta sahibkarlıq subyektlərinin təhsil, elm, tədqiqat və dəstək layihələrinin maliyyələşdirilməsi üçün elan edilmiş ilk müsabiqəyə sənəd qəbulu 17 fevral - 18 mart tarixlərində, layihələrin ekspertizası və qiymətləndirilməsi isə 19 mart - 23 aprel tarixlərində həyata keçirilib, 30 aprel tarixində isə Ekspert Komissiyasının ilk iclası keçirilib. Ekspert Komissiyası tərəfindən layihələrin qiymətləndirilməsi zamanı müvafiq meyarlara uyğun olaraq, onun mikro, kiçik və orta sahibkarlığın inkişafına təsiri, innovativliyi, əsaslandırılmış ideyasının olması, praktiki məqsədlər üçün tətbiq imkanları, layihənin icrası üçün lazımi təcrübənin və maddi-texniki bazanın mövcudluğu və digər bu kimi amillər əsas götürülüb.

Son xəbərlər

Orphus sistemi