“Jaguar Land Rover” elektromobil istehsalına keçir

Böyük Britaniyanın “Jaguar Land Rover” (JLR) holdinqi yaxın illərdə elektromobil istehsalına keçəcək.

“Report” xəbər verir ki, şirkətin bugünkü açıqlamasında 2025-ci ilədək “Jaguar” brendi altında yalnız luxury sinfinə aid elektromobillər buraxacaqları, 2030-cu ilədək “Land Rover” brendi ilə buraxılacaq avtomobillərin 60 faizinin elektromobil, qalanların isə benzin mühərrikli olacağı qeyd olunur.

O cümlədən 2024-2025-ci illərdə “Land Rover”in 6 elektrik modeli təqdim olunacaq. 2026-cı ilədək dizel mühərriklərindən bütövlükdə imtina etmək, 2039-cu ilədək karbon qazı tullantılarını sıfırlamaq hədəflənir.

“Jaguar Land Rover” 2008-ci ildən Hindistanın ən böyük avtomobil istehsalçısı “Tata Motors”a məxsusdur. “Tata Group”un “Reimagine” adlı ekoloji təmizlik strategiyasına JRL-nin qoşulduğu xəbərindən sonra “Tata Group”un səhmləri Mumbai Fond Birjasında 3 faiz bahalaşıb.