Gürcüstanın xarici ticarət dövriyyəsi 12% azalıb

Bu ilin yanvar-fevral aylarında Gürcüstan xarici ölkələrlə 1 mlrd 654 mln ABŞ dolları dəyərində ticarət əməliyyatı aparıb.

“Report” xəbər verir ki, bu barədə Gürcüstanın Milli Statistika İdarəsinin hesabatında bildirilir.

Sənədə əsasən, bu, ötən ilin eyni dövrünə nisbətən 12% azdır.

Ötən iki ay ərzində qonşu ölkə 494,7 mln ABŞ dolları dəyərində məhsul ixrac edib, 1 mlrd 159,3 mln ABŞ dolları dəyərində isə məhsul idxal edib. Bunlar isə illik müqayisədə 6,8% və 14,1% azdır.

Nəticədə xarici ticarətdə 664,6 mln ABŞ dollarlıq kəsir yaranıb ki, bunun da ümumi ticarət dövriyyəsindəki payı 40,2%-dir.