“Facebook” 70 milyon dollar cərimələnib

"Facebook" sosial şəbəkəsinin sahibi olan ABŞ-ın eyni adlı şirkəti Böyük Britaniyada 70 milyon dollara yaxın cərimə ödəməli olacaq.

"Report" xarici mətbuata istinadən xəbər verir ki, şirkəti Britaniyanın tənzimləyici orqanı cərimə edib.

Buna səbəb "Facebook"un “Giphy” xidmətini almasına dair məlumat verməkdən imtina etməsidir. Son nəticədə şirkət 50,5 milyon funt sterlinq və yaxud 69,5 milyon ABŞ dolları cərimələnib. Bununla belə, “Facebook” cəriməni ödəmək istəmir və buna qarşı addımlar atmaq niyyətindədir.

Xatırladaq ki, sosial şəbəkə “Giphy”ni əldə etmək barədə qərarını ötən ilin yazında açıqlayıb. Sövdələşmənin dəyəri 400 milyon dollardır. Patformanı “Instagram”a birləşdirmək nəzərdə tutulur. Böyük Britaniyanın Rəqabət və Bazarlar üzrə İdarəsi isə həmin ilin iyun ayında bununla bağlı araşdırmaya başlayıb və bu ilin avqust ayında isə müəyyən edilib ki, "Giphy”nin alınması sosial şəbəkələr arasındakı rəqabətə xələl gətirə bilər.