Bakıda Azərbaycan-Slovakiya biznes-forumu keçirilib

Bakıda Azərbaycan-Slovakiya biznes-forumu keçirilib Bu gün Bakıda İqtisadiyyat Nazirliyinin təşkilatçılığı ilə Azərbaycan-Slovakiya biznes-forumu işə başlayıb.
Biznes
19 Oktyabr , 2021 21:28
Bakıda Azərbaycan-Slovakiya biznes-forumu keçirilib

İqtisadiyyat Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) və Slovakiyanın İnvestisiya və Ticarətin Təşviqi Agentliyinin (SARİO) təşkilatçılığı ilə Azərbaycan-Slovakiya biznes forumu keçirilib. 

"Report" xəbər verir ki, tədbirdə rəsmi şəxslərlə yanaşı, hər iki tərəfdən İKT, tikinti, qida və s. sahələrdə fəaliyyət göstərən 50-dək iş adamı iştirak edib. 

İqtisadiyyat nazirinin müavini Niyazi Səfərov Azərbaycan-Slovakiya əlaqələrinin uğurla inkişaf etdiyini, iki ölkə arasında əməkdaşlığın genişləndirilməsi üçün böyük potensialı vurğulayıb. Bildirilib ki, Slovakiya şirkətləri ölkəmizdə sənaye, tikinti və xidmət sahələrində uğurla fəaliyyət göstərir. Ölkələrimiz arasında enerji, humanitar, turizm və s. sahələrdə də tərəfdaşlıq inkişaf edir. 

Nazir müavini Azərbaycan iqtisadiyyatı, ölkəmizdə sahibkarlıq, biznes və investisiya mühitinin yaxşılaşdırılması sahəsində aparılan islahatlar barədə məlumat verib, slovakiyalı iş adamlarını Azərbaycanda yaradılmış əlverişli biznes və investisiya mühitindən yararlanmağa, müxtəlif sahələrə investisiya yatırmağa dəvət edib. 

Slovakiyanın xarici işlər və Avropa naziri İvan Korçok Azərbaycana səfərindən məmnunluğunu bildirib, ölkəsinin Azərbaycanla iqtisadi-ticarət əlaqələrinin genişlənməsində maraqlı olduğunu vurğulayıb. İvan Korçok ölkəsinin iqtisadiyyatı barədə məlumat verib, sahibkarların iştirakı ilə keçirilən bu cür tədbirlərin işgüzar dairələr arasında əlaqələrin genişləndirilməsinə töhfə verəcəyini bildirib. 

AZPROMO-nun rəhbəri Yusif Abullayev xarici investisiyaların təşviqi məqsədilə rəhbərlik etdiyi qurum tərəfindən görülən işlər və həyata keçirilən tədbirlər barədə danışıb. 

İqtisadiyyat Nazirliyinin tabeliyində Kiçik və Orta Biznesin İnkişafı Agentliyinin (KOBİA) İdarə Heyətinin sədri Orxan Məmmədov Agentliyin fəaliyyəti, sahibkarlara göstərilən dəstək və xidmətlər barədə məlumat verib, KOBİA-nın xarici iş adamlarına və investorlara ölkəmizdə müvafiq qurumlarla əlaqələndirmə, yerli tərəfdaşların tapılması və digər istiqamətlərdə dəstək göstərə biləcəyini diqqətə çatdırıb. 

Biznes forum iş adamları arasında ikitərəfli görüşlərlə davam etdirilib.

17:44

Bu gün Bakıda İqtisadiyyat Nazirliyinin təşkilatçılığı ilə Azərbaycan-Slovakiya biznes-forumu işə başlayıb.

“Report” xəbər verir ki, tədbiri giriş sözü ilə nazir müavini Niyazi Səfərov açıb.

“Azərbaycanla Slovakiya arasında tərəfdaşlığın genişləndirilməsində böyük potensial görürük. Əminəm ki, biznes forum tərəfdaşlıq üçün yaxşı imkanlar yaradır. Hər iki ölkənin potensialından tam istifadə edilməsi ilə bu münasibətlərin daha məzmunlu və səmərəli olacağına, qarşılıqlı ticarəti, investisiya qoyuluşlarını artıracağına əminəm.

Azərbaycanla Slovakiya arasında olan münasibətlərin həm ikitərəfli formatda, həm də Avropa İttifaqı ilə əməkdaşlıq çərçivəsində inkişafına önəm veririk. Hazırkı dövrdə ticarət əlaqələrinin artırılması və şaxələndirilməsi əsas hədəflərimizdən biridir. Bugünkü biznes forumda informasiya texnologiyaları, o cümlədən telekommunikasiya, eləcə də bankçılıq, ticarət, qida sənayesi və digər sahələrdə fəaliyyət göstərən dövlət və özəl qurumların nümayəndələri iştirak edirlər. Sahibkarlar yaradılmış əlverişli şəraitdən istifadə edərək səmərəli əməkdaşlıq edə bilərlər”, - deyə o qeyd edib.

Son xəbərlər

Orphus sistemi