Azərbaycanda zərgərlik bazarının idxal və ixrac perspektivləri: Dünya və yerli brendlərin rəqabət imkanları

Azərbaycanın zərgərlik məmulatları bir çox ölkələrdə keyfiyyətli məmulatlar kimi qəbul olunur.

Bunu “Report”a açıqlamasında "Azərbaycan Zərgərlər Assosiasiyası" İctimai Birliyinin sədri Toğrul Abbasquliyev deyib.

O, zərgərlik məmulatı ixrac etdiyimiz ölkələr sırasında Özbəkistanı, Qazaxıstanı, Qırğızıstanı, BƏƏ və Türkiyəni xüsusi vurğulayıb.

İxrac bazarlarımız genişləndirilir

“Bizim məmulatların bu ölkələrdə kifayət qədər böyük rəqabətə malik gücü var. Bizim dəstəyimizlə Azərbaycan istehsalçıları “AzerGold” QSC-dən qızıl alaraq zərgərlik məmulatları hazırlayıb ixrac edirlər. Bəzi brendlərimizin Özbəkistanda vahid “Made in Azerbaijan” brendi ilə təmsil olunması barədə danışıqlar aparırıq. Türkiyədə, Qazaxıstanda, Özbəkistanda Azərbaycana məxsus brendlərin satış nöqtələri var. Hər il bu göstəricilərin artacağını düşünürəm. Bu ölkələrlə qarşılıqlı razılaşmalarımız var ki, bizim brendlər həmin ölkələrdə, onların da brendləri Azərbaycanda təmsil olunsun", - T. Abbasquliyev bildirib.

Beynəlxalq sərgilərə çıxış

Onun sözlərinə görə, 2022-ci ildə Azərbaycan zərgərlik məmulatlarının ixrac həcmi 19 milyon manatdan çox olub: "Bu göstəricinin artırılması üçün beynəlxalq və regional sərgilərdə iştirak etmək önəmlidir. Azərbaycan hələ ki, bu sərgilərdə iştirak edə bilmir. Amma iqtisadiyyat Nazirliyi və İxracın və İnvestisiyaların Təşviqi Agentliyi (AZPROMO) ilə danışıqlarımıza əsasən ümid edirəm ki, yaxın zamanda həmin beynəlxalq zərgərlik sərgi və festivallarında Azərbaycan məmulatlarını təmsil edə biləcəyik”.

Azərbaycanda əksər brendlər təmsil olunub

T.Abbasquliev dünyanın “A” sinif zərgərlik brendlərinin hamısının Azərbaycanda təmsil olunduğunu bildirib:

“Məşhur “Tiffany”, “Bulgari”, “Roberto Coin”, “Chopard”, "Cartier", "Graff" kimi brendlərin hamısı ölkəmizdə təmsil olunur. Azərbaycanda “B” sinfə də aid dünya brendləri var. Bunlar əsasən Türkiyə, İtaliya, Rusiya brendləridir. Rusiyanın məşhur “Sokolov” brendi burda təmsil olunur. Məşhur “Pandora” markasının Azərbaycanda 5 satış mağazası var. Yəni Azərbaycanda hər kateqoriyadan olan dünya markaları mövcuddur”.

Qiymət fərqi varmı?

O bildirib ki, “A” sinfi brendlərin qiyməti müxtəlif ölkələrdə təqribən eynidir:

“Hansısa ölkədə qiymət fərqi çox olsa, orda satışlar xeyli aşağı olar. Çünki bu gün insanların öz ölkəsindən xaricə rahat çıxış imkanı var. Tanınmış brendlər yerli dilerlərlə elə işləyirlər ki, məhsullarının həmin ölkədəki qiymətləri dünya bazarındakı qiymətlərə uyğun olsun. Azərbaycanda da belədir. Topdan satılan qızıl, gümüş və ya qiymətli daşlardan hazırlanan məmulatların qiyməti onun dizaynına uyğun dəyişir”.

585 əyarlı qızıl məmulatı 95 manata satılır

T.Abbasquliyev birjada bir qram 999 əyarlı qızılın qiymətinin 62 ABŞ dolları olmasına toxunub:

"Bu o deməkdir ki, Azərbaycanda bir qram 585 əyarlı qızıl məmulatının maya dəyəri 70 manatdan başlayır. Söhbət ən sadə işçilikli, fərqli dizaynı olmayan məmulatlardan gedir. Fərqli dizaynlıların qiyməti daha yüksək olur. 750 əyarlı qızılın isə maya dəyəri 80 manatdan başlayır. Bunun üzərinə sahibkarın gəlir marjası da əlavə edilir. Bu marja bir qrama görə 10 manat, 30 manat və daha çox ola bilər. Qiymətin üzərinə ƏDV də əlavə olunur. Bu hesabla bazarda minimum gəlir marjası ilə (10 manat) 585 əyarlı qızıl məmulatının qiymətinin 95 manatdan başlaması məntiqə uyğundur".

750 əyarlı məmulat 105-106 manata satılmalıdır

Assosiasiya qeyd edib ki, məmulatın dizaynı fərqlidirsə, qiyməti baha olur:

"Bu, əsasən İtaliya, İspaniya brendlərinə aiddir. Azərbaycan və Türkiyə məmulatlarında da belə hallara rast gəlinir. Onların bir qrama görə qiymətləri 120-150 manat və ya daha yüksək olur. 750 əyarlı qızıl məmulatının isə qiyməti minimum gəlir marjası ilə 105-106 manat edir. Bu, bir qram məmulatın üçün məntiqə uyğun minimal satış qiymətidir. Məmulatın üzərində qiymətli daşlar varsa, qiymət individual olaraq təyin edilir”.

Qeyd edək ki, bu ilin yanvar-iyun aylarında Azərbaycana xarici ölkələrdən 21,634 milyon ABŞ dolları dəyərində 1 min 608 kiloqram zərgərlik məmulatları (gümüşdən və digər qiymətli metallardan) idxal edilib. Bu, 2022-ci ilin eyni dövrünün göstəricisindən dəyər ifadəsində 2,1 dəfə, kəmiyyət olaraq – 41 % çoxdur. Həmin dövrdə ölkədən 997,15 min ABŞ dolları dəyərində 12,1 kiloqram zərgərlik məmulatı ixrac edilib ki, bu da illik müqayisədə müvafiq olaraq 10 və 27 dəfə çoxdur. 6 ayda Azərbaycan İspaniyaya 371,47 min ABŞ dolları dəyərində 1,96 kiloqram, BƏƏ-ə 367 min ABŞ dolları dəyərində 7,46 kiloqram, İsveçrəyə 172,1 min ABŞ dolları dəyərində 0,04 kiloqram və Fransaya 86,6 min ABŞ dolları dəyərində 2,59 kiloqram zərgərlik məmulatı satıb.