Azərbaycanda özəlləşdirməyə təqdim olunan dövlət əmlaklarının çoxu satılmır

İqtisadiyyat Nazirliyi yanında Əmlak Məsələləri Dövlət Xidmətinin özəlləşdirməyə təqdim etdiyi dövlət əmlaklarının çoxu satılmır.

Bu, "Report"un apardığı araşdırma nəticəsində məlum olub.

Təkcə son 3 ayda (iyun-avqust aylarında) ölkədə səhmdar cəmiyyətlərinin (SC), kiçik dövlət müəssisələrinin və obyektlərinin, yarımçıq tikililərin, qeyri-yaşayış sahələrinin, nəqliyyat vasitələrinin özəlləşdirilməsi ilə bağlı 9 hərrac keçirilib. Bu hərraclara bir hissəsi təkrar olmaqla ümumilikdə 292 dövlət əmlakı çıxarılıb. 52 əmlak isə özəlləşdirilib. Ayrı-ayrı hərraclar üzrə isə vəziyyət fərqlidir.

Məsələn, iyunun 8-də keçirilmiş hərraca 56 dövlət əmlakı, o cümlədən 35 SC, 19 kiçik dövlət müəssisəsi və obyekti, 2 yarımçıq tikili çıxarılıb. Bunlardan isə cəmi 4-ü, o cümlədən 1 SC, 2 kiçik dövlət müəssisəsi və obyekti, 1 yarımçıq tikili satılıb. Başqa sözlə, özəlləşdirmə nisbəti cəmi 7% təşkil edib.

Növbəti hərrac iyunun 22-də baş tutub. Hərraca 21 dövlət əmlakı, o cümlədən 20 kiçik dövlət müəssisəsi və obyekti, 1 yarımçıq tikili çıxarılıb. Bunlardan isə yalnız 1 kiçik dövlət müəssisəsinə müştəri tapmaq mümkün olub. Başqa sözlə, özəlləşdirmə nisbəti cəmi 5% təşkil edib.

İyunun 29-da keçirilmiş hərraca isə 79 dövlət əmlakı, o cümlədən 35 SC, 15 kiçik dövlət müəssisəsi və obyekti, 1 yarımçıq tikili, 28 nəqliyyat vasitəsi çıxarılıb. Bunlardan isə yalnız 9-u, o cümlədən 1 SC, 8 nəqliyyat vasitəsi özəlləşdirilib. Başqa sözlə, özəlləşdirmə nisbəti cəmi 11% təşkil edib.

Növbəti hərrac iyulun 13-də baş tutub. Hərraca 19 dövlət əmlakı, o cümlədən 17 kiçik dövlət müəssisəsi və obyekti, 1 yarımçıq tikili, 1 qeyri-yaşayış sahəsi çıxarılıb. Bunlardan isə yalnız 1 yarımçıq tikiliyə pul verən olub. Başqa sözlə, özəlləşdirmə nisbəti cəmi 5% təşkil edib.

İyulun 27-də keçirilmiş hərraca isə 31 dövlət əmlakı, o cümlədən 19 kiçik dövlət müəssisəsi və obyekti, 1 yarımçıq tikili və 11 nəqliyyat vasitəsi çıxarılıb. Bunlardan isə 10 nəqliyyat vasitəsi satılıb. Başqa sözlə, özəlləşdirmə nisbəti 32% təşkil edib.

Növbəti hərrac avqustun 3-də baş tutub. Hərraca 16 dövlət əmlakı, o cümlədən 15 kiçik dövlət müəssisəsi və obyekti, 1 yarımçıq tikili çıxarılıb. Bunlardan isə heç birinə müştəri tapmaq mümkün olmayıb. Başqa sözlə, özəlləşdirmə nisbəti 0% təşkil edib.

Avqustun 10-da keçirilmiş hərraca isə 17 nəqliyyat vasitəsi çıxarılıb. Bunlardan isə 7-si özəlləşdirilib. Başqa sözlə, özəlləşdirmə nisbəti 41% təşkil edib.

Növbəti hərrac avqustun 17-də baş tutub. Hərraca 29 dövlət əmlakı, o cümlədən 17 kiçik dövlət müəssisəsi və obyekti, 1 qeyri-yaşayış sahəsi, 11 nəqliyyat vasitəsi çıxarılıb. Bunlardan isə 18-nə, o cümlədən 1 kiçik dövlət müəssisəsinə və 11 nəqliyyat vasitəsinə pul verən olub. Başqa sözlə, özəlləşdirmə nisbəti 62% təşkil edib.

Növbəti hərrac avqustun 31-də baş tutub. Hərraca 24 dövlət əmlakı, o cümlədən 3 SC, 19 kiçik dövlət müəssisəsi və obyekti, 2 yarımçıq tikili çıxarılıb. Bunlardan isə cəmi 2-nə - 1 SC-yə və 1 kiçik dövlət müəssisəsinə müştəri tapmaq mümkün olub. Başqa sözlə, özəlləşdirmə nisbəti cəmi 8% təşkil edib.