Azərbaycanda hava nəqliyyatı ilə yükdaşımaların dəyəri artıb, həcmi azalıb

Bu ilin yanvar-sentyabr aylarında Azərbaycanda hava nəqliyyatı ilə 1 milyard 370 milyon 884 min ABŞ dolları dəyərində 76 min 449 ton yük daşınıb.

“Report” Dövlət Gömrük Komitəsinə istinadən xəbər verir ki, bu, 2022-ci ilin eyni dövrünə nisbətən dəyər baxımından 9,6 % çox, həcm baxımından isə 16,5 % azdır.

Hesabat dövründə hava nəqliyyatı ilə 240 milyon 222 min ABŞ dolları dəyərində 67 min 300 ton yük ixrac olunub. Son 1 ildə ixracın dəyəri 10 %, həcmi isə 25 % azalıb.

9 ay ərzində Azərbaycana hava nəqliyyatı ilə idxal olunan yüklərin dəyəri 1 milyard 130 milyon 656 min ABŞ dolları, həcmi 9 149 ton olub. Bunlar isə 1 il əvvələ nisbətən müvafiq olaraq 14,2 % və 19,4 % çoxdur.