Azərbaycanda beynəlxalq poçt göndərişlərinin həcmi 32 % azalıb

2024-cü ilin yanvar-fevral aylarında Azərbaycanda beynəlxalq poçt göndərişlərinin dəyəri 9 milyon 954 min ABŞ dolları, həcmi isə 41 ton təşkil edib.

“Report”un Dövlət Gömrük Komitəsinə istinadən məlumat verir ki, bu, 2023-cü ilin eyni dövrü ilə müqayisədə müvafiq olaraq 38,5 % və 31,7 % azdır.

Qeyd edilib ki, ötən iki ay ərzində Azərbaycana xarici ölkələrdən 9 milyon 646 min ABŞ dolları dəyərində 40 ton poçt göndərişi idxal edilib ki, bu da 2023-cü ilin eyni dövrü ilə müqayisədə müvafiq olaraq 36,9 % və 32,5 % azdır.

Hesabat dövründə Azərbaycandan xaricə isə 307 min ABŞ dolları dəyərində 0,86 ton poçt göndərişi ixrac edilib ki, bu da ötən ilin analoji dövrünə nisbətən 48 % və 39 % azdır.