Azərbaycan xarici ölkələrlə avtomobil nəqliyyatı ilə yükdaşımaları artırıb

Bu ilin yanvar-iyun aylarında Azərbaycanın xarici ölkələrlə avtomobil nəqliyyatı ilə yük dövriyyəsi il ərzində 8,9 % artaraq 2 milyon 588 min 448 ton təşkil edib.

“Report” Dövlət Gömrük Komitəsinə istinadən xəbər verir ki, bu həcmdə yükün dəyəri 5 milyard 730 milyon 604 min ABŞ dolları olub. Bu isə, 2022-ci ilin eyni dövrü ilə müqayisədə 18,5 % çoxdur.

O cümlədən, 6 ay ərzində avtomobil nəqliyyatı ilə 914 milyon 477 min ABŞ dolları dəyərində 996 min 617 ton yük ixrac olunub, 4 milyard 816 milyon 127 min ABŞ dolları dəyərində 1 milyon 591 min 830 ton yük idxal edilib.

Hesabat dövründə ixrac olunan yükün dəyəri 2,3 % azalıb, həcmi 7,5 % artıb. İdxal olunan yükün isə dəyəri 23,5 %, həcmi 9,8 % artıb.