Azərbaycan və Bolqarıstan iqtisadi əlaqələrin təşviqini müzakirə edib

İqtisadiyyat naziri Mikayıl Cabbarovun Bolqarıstanın iqtisadiyyat və sənaye naziri Nikola Stoyanovla görüşündə Azərbaycan-Bolqarıstan iqtisadi-ticarət əməkdaşlığının inkişafı müzakirə edilib.

"Report" xəbər verir ki, Azərbaycanın iqtisadiyyat naziri ölkələrimiz arasında münasibətlərin inkişafını, iqtisadiyyatın müxtəlif sahələrində, xüsusilə enerji sahəsində əlaqələrin genişləndiyini vurğulayıb. Ölkəmizin əlverişli işgüzar mühitini, işğaldan azad edilmiş ərazilərimizin iqtisadi potensialını diqqətə çatdıran nazir Bolqarıstan şirkətlərini Azərbaycanın işgüzar mühitindən yararlanmağa və fəal əməkdaşlığa dəvət edib.

Bolqarıstanın iqtisadiyyat və sənaye naziri Nikola Stoyanov ölkəsinin ikitərəfli münasibətlərin inkişafında maraqlı olduğunu, iqtisadi əlaqələrin genişləndirilməsinin digər sahələrdə də tərəfdaşlığın möhkəmləndirilməsinə töhfə verəcəyini qeyd edib.

Tərəflər iqtisadi əməkdaşlığın perspektiv istiqamətləri, investisiya imkanlarının müəyyənləşdirilməsi, nəqliyyat-tranzit sahəsində əlaqələr və Bolqarıstana qaz tədarükü ilə bağlı fikir mübadiləsi aparıb.

İqtisadiyyat naziri Mikayıl Cabbarov Bolqarıstanın iqtisadiyyat və sənaye naziri Nikola Stoyanov ilə görüşüb.

"Report" xəbər verir ki, bu barədə azərbaycanlı nazir məlumat verib.

"Ölkələrimiz arasında iqtisadi əlaqələrin təşviqi, investisiya imkanlarının müəyyənləşdirilməsi, nəqliyyat-tranzit sahəsində əməkdaşlıq və Bolqarıstana qaz tədarükü ilə bağlı məsələləri müzakirə etdik", - deyə o qeyd edib.