Azərbaycan Türkiyədən xalça idxalına çəkdiyi xərci açıqlayıb

Bu ilin yanvar-iyul aylarında Azərbaycan Türkiyədən 4,124 milyon ABŞ dolları dəyərində xalça idxal edib.

“Report” xəbər verir ki, bu barədə Türkiyə İxracatçılar Məclisinin (TİM) hesabatında deyilir.

Məlumata görə, bu, 2023-cü ilin eyni dövrün göstəricisi ilə müqayisədə 20,3 % azdır.

Təkcə iyul ayında Türkiyə Azərbaycana 890 min ABŞ dolları dəyərində xalça ixrac edib ki, bu da, illik müqayisədə 113,1 % və ya 2,1 dəfə çoxdur.

7 ayda Türkiyənin ümumi xalça ixracının dəyəri illik müqayisədə 9,5 % artaraq 1,605 milyard ABŞ dollarına, iyul ayında isə 22,8 % artaraq 230 milyon ABŞ dollarına çatıb.