Azərbaycan Türkiyədən sement tədarükünü 24 % artırıb

Bu ilin yanvar-fevral aylarında Azərbaycan Türkiyədən 9,112 milyon ABŞ dolları dəyərində sement, şüşə, keramika və torpaq məmulatları idxal edib.

“Report” xəbər verir ki, bu barədə Türkiyə İxracatçılar Məclisinin (TİM) hesabatında deyilir.

Məlumata görə, bu, ötən ilin eyni dövrü ilə müqayisədə 24,1 % çoxdur.

Təkcə bu ilin fevral ayında isə Türkiyə Azərbaycana 4,42 milyon ABŞ dollarlıq sement, şüşə, keramika və torpaq məmulatları ixrac edib ki, bu da, illik müqayisədə 11,3 % çoxdur.

Bu ilin 2 ayında Türkiyənin ümumi sement, şüşə, keramika və torpaq məmulatları ixracının dəyəri illik müqayisədə 7,8 % azalaraq 0,721 milyard ABŞ dollarına, fevral ayında isə 15,8 % azalaraq 0,36 milyard ABŞ dollarına çatıb.