Azərbaycan sahibkarları Türkiyədə distribyüterlik və ixracla bağlı razılıqlar əldə ediblər

Türkiyənin Antalya şəhərində keçirilmiş 28-ci Beynəlxalq Qida və İçki Sərgisi çərçivəsində Azərbaycan sahibkarları yeni əməkdaşlıqlara dair ilkin razılıqlar əldə ediblər.

Bu barədə “Report”a İqtisadiyyat Nazirliyi yanında Kiçik və Orta Biznesin İnkişafı Agentliyindən (KOBİA) bildirilib.

Məlumata görə, sərgidə təmsil olunan mürəbbə, təbii sıxım yağlarının və əzmələrin istehsalçıları distribyüterliyə dair Türkiyə şirkətləri ilə, zəfəran istehsalçıları yerli zəfəran və ondan hazırlanmış məhsulların ərəb ölkələrinə ixracına, quru meyvə istehsalçısı isə qurudulmuş xurmanın Türkiyənin ticarət şəbəkələrində satışına dair ilkin razılıq əldə ediblər.

Qeyd edək ki, yanvarın 18-21-də keçirilən sərgidə KOBİA-nın təşkil etdiyi xüsusi stenddə 15 mikro və kiçik sahibkarlıq subyekti məhsullarını təqdim edib. "Made in Azerbaijan" stendində quru meyvələr, təbii sıxım yağları, konservləşdirilmiş məhsullar, meyvə şirələri, çay, giləmeyvələr, zəfəran və ondan hazırlanmış məhsullar, çərəzlər, şirniyyat, şokolad və digər qida məhsulları nümayiş olunub.