Azərbaycan əsas tədarük bazarından elektromobil idxalını 18 dəfə artırıb

Bu ilin ilk iki ayı ərzində Azərbaycana xarici ölkələrdən 9,32 milyon ABŞ dolları dəyərində 222 ədəd elektromobil idxal edilib.

“Report”un Dövlət Statistika Komitəsinin məlumatları əsasında apardığı hesablamalara əsasən, bu, 2022-ci ilin eyni dövrünün göstəricisindən dəyər ifadəsində 7,4 dəfə, kəmiyyət olaraq – 4 dəfə çoxdur.

Hesabat dövründə Azərbaycana Çindən 5,26 milyon ABŞ dolları dəyərində (bir il əvvəlki göstəricidən 19 dəfə çoxdur) 158 ədəd (+18 dəfə), Almaniyadan 2,71 milyon ABŞ dolları dəyərində (+11 dəfə) 30 ədəd (+10 dəfə), Amerika Birləşmiş Ştatlarından 709 min ABŞ dolları dəyərində (+3 dəfə) 16 ədəd (+2 dəfə), Belçikadan 259 min ABŞ dolları dəyərində (-1,9 %) 4 ədəd (dəyişməyib), Koreyadan 126,24 min ABŞ dolları dəyərində 3 ədəd (bir il əvvəl tədarük olmayıb) avtomobil gətirilib.

Qeyd edək ki, 2022-ci ildə Azərbaycana xaricdən (14 ölkədən) gətirilən 486 ədəd elektromobilin 61 %-i Çinin payına düşüb.