“Aqrolizinq”in son 14 ildə gördüyü işlər açıqlanıb

Bakı. 20 dekabr. REPORT.AZ/ Kənd Təsərrüfatı Nazirliyi yanında “Aqrolizinq” ASC-nin fəaliyyət göstərdiyi 2005-2018-ci illərdə fermerlərə 40 mindən çox aqrar texnika satılıb və yaxud lizinqə verilib.

“Report” xəbər verir ki, bu barədə Nazirliyin İctimaiyyətlə əlaqələr və informasiya təminatı şöbəsinin müdir müavini Vüqar Hüseynov məlumat verib.

Bundan başqa, səhmdar cəmiyyəti kənd təsərrüfatı məhsulları istehsalçılarına 35 minə yaxın damazlıq heyvan satıb və yaxud lizinqə verib, həmçinin 795 min tona yaxın gübrə və 300 min ton pektisidi lizinq yolu ilə fermerlərə çatdırıb.