Yuxarı

Azərbaycanda Karantin Ekspertiza və Toksikologiya və Keyfiyyətə Nəzarət mərkəzlərinin yeni strukturu təsdiq edilib

Artıq bir neçə istiqamət üzrə laboratoriyalar fəaliyyətə başlayıb

Bakı. 27 oktyabr. REPORT.AZ/ Kənd Təsərrüfatı Nazirliyi yanında Dövlət Fitosanitar Nəzarəti Xidmətinin Respublika Karantin Ekspertiza Mərkəzi və Respublika Toksikologiya və Keyfiyyətə Nəzarət Mərkəzinin yeni strukturu təsdiq edilib. Xidmətin Mətbuat Katibliyindən "Report"a daxil olan xəbərə görə, bu, kənd təsərrüfatı naziri Heydər Əsədovun “Azərbaycan Respublikası Kənd Təsərrüfatı Nazirliyi yanında Dövlət Fitosanitar Nəzarəti Xidmətinin (DFNX) strukturunun təkmilləşdirilməsi barədə” 18 fevral 2015-ci il tarixli 12 nömrəli əmrinə uyğun olaraq baş tutub.

Məlumata görə, Respublika Karantin Ekspertiza Mərkəzinin tərkibində Entomologiya, Fitopatologiya, Fitohelmintologiya, Herbologiya və Molekulyar diaqnostika laboratoriyaları yaradılıb. Respublika Toksikologiya və Keyfiyyətə Nəzarət Mərkəzinin tərkibində isə Pestisidlərin, nitrat və nitritlərin qalıq miqdarının təyini, ağır metalların təyini, pestisidlərin, bioloji preparatların, aqrokimyəvi maddələrin təyini və Mikotoksinlərin təyini laboratoriyaları fəaliyyətə başlayıb. Bu proqramların həyata keçirilməsi üçün daxili imkanlarla yanaşı, beynəlxalq təşkilatların dəstəyindən də geniş istifadə olunur. Dünya Bankının Azərbaycan üçün Kənd Təsərrüfatının İnkişafı Kredit Laiyhəsinin (ADCP) III fazasının komponentlərindən biri - Ərzaq təhlükəsizliyi, heyvan sağlamlığı və bitki mühafizəsi və karantini olmaqla, SFS xidmətlərinin gücləndirilməsini nəzərdə tutur. Layihənin “Bitki sağlamlığı və fitosanitar sistemin təkmilləşdirilməsi” sub-komponenti üzrə fəaliyyət məhz DFNX-nin gücləndirilməsinə yönəlib.

Bu fəaliyyətlərin iki istiqamətdə (zərərli orqanizmlərin diaqnostikası imkanlarının gücləndirilməsi və zərərli orqanizmlərə nəzarət və risklərin təhlili) aparılması nəzərdə tutulub.

Birinci istiqamət üzrə Dövlət Xidmətinin Respublika Karantin Ekspertiza və Toksikologiya və Keyfiyyətə Nəzarət Mərkəzlərinin laboratoriyalarının lazımi avadanlıqla təchizatı və zərərvericilərin diaqnostikası üsullarının təkmilləşdirilməsi üçün laboratoriya əməkdaşlarına ünvanlı təlimlərin və texniki yardımın göstərilməsi, eləcə də ikinci istiqamət üzrə zərərli orqanizmlərə nəzarət və zərərli orqanizmlərin yayılması riskinin təhlil edilməsi imkanlarının gücləndirilməsi məqsədi ilə əməliyyat təlimatlarının və proseduraların hazırlanmasında Dövlət Xidmətinə texniki yardım və müasir yanaşmaların tətbiqi nəzərdə tutulub. Bu məqsədlə də rəhbər işçilər və heyət üçün təlimləri, proqram təminatı və lazımi avadanlıqlarla təchizatı edilməsi həyata keçiriləcək.

Artıq layihələrin icrasına başlanılıb və oktyabrın 5-21-də beynəlxalq ekspertlər - Sloveniyadan bitki mühafizəsi üzrə mütəxəssis Tanya Dreo və İsraildən toksikoloiya üzrə mütəxəssis İsaak Skalski Dövlət Xidmətində olublar.

Səfər çərçivəsində Respublika Karantin Ekspertiza Mərkəzi və Respublika Toksikologiya və Keyfiyyətə Nəzarət Mərkəzinin laboratoriyalarında fəaliyyət göstərən mütəxəssislərin iştirakı ilə mövcud vəziyyətin təhlili, işlərin beynəlxalq standartların tələblərinə uyğun olaraq yenidən qurulması, laboratoriyaların zəruri avadanlıqla təchizatı, zərərərli orqanizmlərin diaqnostikası, pestisidlərin, aqrokimyəvi maddələrin və bitkiçilik məhsullarının keyfiyyət göstəricilərinin təyini üsullarının təkmilləşdirilməsi məqsədilə laboratoriya işçilərınə ünvanlı təlimlərin və texniki yardımın göstərilməsi istiqamətində əhəmiyyətli işlər görülüb.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi