İntensiv yağışlar Biləsuvarın pambıq sahələrinə zərər vurur

Bir neçə gündür ki, Biləsuvar rayonunda intensiv yağışlar yağır.

Bu yağıntıların kənd təsərrüfatına, xüsusən də pambıq sahələrinə ziyan vurub-vurmaması ilə bağlı "Report"un Muğan bürosunun əməkdaşı qısa araşdırma aparıb.

Məsələ ilə bağlı fermerlər hazırkı vəziyyətdən çox narahatdırlar. Onların sözlərinə görə, yağışlı hava şəraiti daha çox pambıq sahələrinə zərər vurur, çünki hazırda məhsulun yetişmə vaxtıdır.

Mövzu barədə kənd təsərrüfatı mütəxəssisi Mirsahib Zəkiyev də bildirib ki, intensiv yağışlar, hava temperaturunun kəskin şəkildə soyuması pambıq təsərrüfatına mənfi təsir göstərəcək. Belə şərait məhsulun yetişməsi və yığılmasını gecikdirəcək: "Həmçinin, belə hava şəraiti tam yetişən və yığıma hazır olan pambıq məhsulunun yerə tökülməsinə səbəb olur ki, bu da məhsul itkisinə və onun keyfiyyətinə mənfi təsir göstərir. Bununla belə, mövcud hava şəraitinin bir neçə müsbət tərəfləri də var. Yağış yonca və arpa səpini aparılan əkin sahələrinə çox yaxşı təsir göstərir. Payızlıq dənli bitkilərin, taxılın əkini üçün torpaqda yaranan yüksək nəmlik və rütubətin hesabına şumlamanın aparılması daha keyfiyyətli alınır".

Biləsuvar Dövlət Aqrar İnkişaf Mərkəzindən verilən məlumata görə, bu il Biləsuvar rayonu ərazisində 6 745 hektar sahədə pambıq əkini aparılıb.

Qeyd edək ki, rayon ərazisində qeyri-sabit hava şəraitinin daha bir neçə gün davam edəcəyi gözlənilir.