Dünya Bankı: "Azərbaycanda tərəvəz istehsalına 4 milyard dollara yaxın investisiya yatırılmalıdır"

Azərbaycanda tərəvəz istehsalını daha dayanıqlı etmək üçün təqribən 9 800 hektar sahədə istixanaların təkmilləşdirilməsinə 3,81 milyard ABŞ dolları investisiya yatırılması tələb edilir.

“Report” xəbər verir ki, bu barədə Dünya Bankı Qrupunun açıqladığı Azərbaycana dair "İqlim və İnkişaf Hesabatı"nda (CCDR) bildirilir.

Sənəddə deyilir ki, 0,5 milyon hektar ərazidə tətbiq edilən (buğda, qarğıdalı, pambıq və tərəvəz üçün) mühafizə xarakterli kənd təsərrüfatı (minimum əkin) texnologiyasının mənimsənilməsinə isə nisbətən az - 10,1 milyon ABŞ dolları investisiya yatırmaq lazımdır.

"Nəmi qoruyan bu texnologiya torpaqların eroziyasını azalda, eləcə də torpaqların strukturunu və məhsuldarlığını yaxşılaşdıra bilər. Bilik mübadiləsinə və təlimlərə daha çox investisiyaların yatırılması da tələb olunacaq. İqlimə dözümlü kənd təsərrüfatına uyğunlaşdırma məqsədilə yatırılan investisiyaların onları əvəzləyən iqtisadi faydaları var və buna görə də uyğunlaşdırma texnologiyalarının və tədbirlərinin maliyyələşdirilməsi üçün həm dövlət sektorunun, həm də özəl sektorun investisiyaları tələb olunur. Subsidiyalara dövlət investisiyaları və yaxud stimulları investisiya xərclərinin 30-40 %-ni təşkil edə bilər və əsasən, maliyyəyə çıxışı məhdud olan və uyğunlaşdırma texnologiyalarını və tədbirlərini mənimsəmək üçün potensialı zəif olan kiçik təsərrüfat sahiblərinə dəstək göstərilməsinə yönələ bilər. Hazırkı təsərrüfatların genişləndirilməsi xidməti fermerlərə təlim və texniki yardım vasitəsilə yeni biliklər öyrədilməsini və yeni texnologiyaların və idarəetmə təcrübələrinin mənimsənilməsi prosesinin sadələşdirilməsini tələb edəcək", - deyə hesabatda qeyd olunub.