“Caspian Agro 2022” çərçivəsində panel müzakirələri keçirilib

Bakıda keçirilən XV Azərbaycan Beynəlxalq Kənd Təsərrüfatı Sərgisi - “Caspian Agro 2022” çərçivəsində “İqlim dəyişikliyinin kənd təsərrüfatına təsiri” mövzusunda panel sessiya keçirilib.

Bu barədə "Report"a Kənd Təsərrüfatı Nazirliyindən bildirilib.

Sessiyada qurumun Torpaqdan istifadəyə nəzarət şöbəsinin müdiri Firuddin Tağıyev, Tərəvəzçilik Elmi -Tədqiqat İnstitutunun direktoru Elmar Allahverdiyev, Əkinçilik Elmi -Tədqiqat İnstitutunun direktoru Faiq Xudayev, Heyvandarlıq Elmi -Tədqiqat İnstitutunun direktoru Mahir Hacıyev və Ekologiya və Təbii Sərvətlər Nazirliyinin Milli Hidrometeorologiya Xidmətinin rəisi Umayra Tağıyeva mövzu ilə bağlı təqdimatla çıxış ediblər.

Bildirilib ki, iqlim dəyişikliyi kənd təsərrüfatı sahəsinin qarşısında yeni çağırışlar formalaşdırır. Yeni texnologiyalar və rəqəmsal həllərin tətbiqi iqlim dəyişikliklərinin təsirlərini minimuma endirməyə, torpaq və su resurslarından davamlı və düzgün istifadəyə imkan verir.

Tədbirdə çıxış edənlər, yeni çağırışlara uyğun olmaqla dayanıqlı kənd təsərrüfatı sisteminin yaradılması ilə davamlı inkişafın təmin edilməsi, ətraf mühiti qorumaqla məhsuldarlığın artırılması, aqrar sahədə elmi yeniliklər, innovasiya və rəqəmsal həllərin tətbiqinin genişləndirilməsinin xüsusi əhəmiyyət kəsb etdiyini vurğulayıblar.

Torpaqların mühafizəsi, biomüxtəlifliyin qorunması, torpaq çirklənməsinin qarşısının alınması, su resurslarından səmərəli istifadə, gübrələrdən düzgün istifadənin təşviqi və effektiv torpaq idarəçiliyinin qurulması istiqamətində müzakirələrdə yerli mütəxəssislər öz fikirlərini bölüşüblər.

Panel sessiyalarda mövzular ətrafında fikir mübadiləsi aparılıb, mütəxəssislər iştirakçıların suallarını cavablandırıblar.