Bu il Azərbaycanın pambıq mahlıcının ixracından gəliri 2 dəfədən çox azalıb

Bu ilin mart ayında Azərbaycan 8,1 milyon ABŞ dolları dəyərində pambıq mahlıcı ixrac edib.

“Report”un məlumatına görə, bu barədə İqtisadi İslahatların Təhlili və Kommunikasiya Mərkəzinin “İxrac İcmalı”nın aprel sayında bildirilir.

Sənədə əsasən, bu, 2022-ci ilin mart ayı ilə müqayisədə 13 milyon ABŞ dolları və ya 2,6 dəfə azdır.

Bu ilin yanvar-mart ayları ərzində Azərbaycan 31,3 milyon ABŞ dolları dəyərində pambıq mahlıcı ixrac edib ki, bu da 2022-ci ilin 3 aylıq göstəriciləri ilə müqayisədə 40,9 milyon ABŞ dolları və ya 2,3 dəfə azdır.

Qeyd edək ki, bu ilin yanvar-mart aylarında Azərbaycanın ümumi ixracı 7,7 milyard ABŞ dolları, qeyri-neft sektoru üzrə ixrac 912,2 milyon ABŞ dolları təşkil edib.