Azərbaycanda üzüm yağının istehsalına başlanılıb

Kənd Təsərrüfatı Nazirliyinin Üzümçülük və Şərabçılıq Elmi-Tədqiqat İnstitutunda (ÜŞETİ) üzümün emalı zamanı yaranan tullantılardan (üzüm toxumu) soyuq sıxma üsulu ilə yağ istehsalına başlayıb, bunun patenti alınıb.

Bunu “Report”a açıqlamasında institutun direktoru Vüqar Səlimov bildirib.

Onun sözlərinə görə, hazırda yağ əldə ediləcək üzüm sortları üzərində araşdırmalar aparılır: “Soyuq sıxma üsulu yağın keyfiyyətini artırır, arzuolunmaz maddələrin yaranma riskini aradan qaldırır, kimyəvi, qoruyucu və qatqı maddəsi daşımır. Dünyada üzüm yağının istehsalı aktualdır. Bu yağdan kosmetik vasitələrin istehsalında, tibbdə, yeyinti sanayesində geniş istifadə edilir”.

V. Səlimov qeyd edib ki, üzümçülük və şərabçılıq sahəsində emal zamanı böyük həcmdə tullantılar yaranır: “Tullantıya toxum, qabıq, daraq daxildir. Təxminən 1 000 ton üzümə 300 ton tullantı yaranır. Ona görə də tullantısız texnologiyanın perspektivi üzümçülük və şərabçılıq sahəsində çox yüksəkdir. İnstitutda üzümün emalı zamanı yaranan qalıqlardan bioloji aktiv maddələrin alınması istiqamətində də elmi tədqiqat işləri həyata keçirilir.”

Onun sözlərinə görə, ÜŞETİ-də həm də ölkənin milli şərab brendləri üçün texniki üzüm sortlarının inkişaf etdirilməsi istiqamətində iş aparılır: “Texniki üzüm sortları müasir üsullarla qiymətləndirilir, onlardan texnoloji istifadə istiqamətləri müəyyən olunur. Onlardan texnoloji istiqamətlərinə görə müxtəlif növ şərablar istehsal edilir. Bu texniki sortlara ölkənin nadir texniki üzüm sortları “Bayanşirə”, “Mələyi”, “Mədrəsə” , “Xindoqnı”, “Şirvanşahı” kimi sortlar daxildir. Bizim texniki üzüm sortları digər ölkələrin sortları ilə müqayisədə daha məhsuldardır. Son illərdə yerli sortların məhsuldarlığının artılması istiqamətində xeyli işlər görülüb”.

Direktor vurğulayıb ki, ölkədə dəmyə şəraitindəki bəzi üzüm bağlarında becərilən xarici sortların quraqlığa və yüksək temperatura davamsızlığı nəticəsində məhsul kəskin şəkildə az olub: "Halbuki, yerli sortlardan yüksək məhsuldarlıq əldə edilib. Bəzən sahibkarlar elə düşünürlər ki, yerli sortlar az məhsuldardır, xarici sortları ölkəyə gətirirlər. Lakin xarici sortların bir çoxu da yerli torpaq-iqlim şəraitinə uyğunlaşmır və məhsul vermir”.