Yuxarı

Azərbaycanda 5,7 min hektar torpaq sahəsi hərraca çıxarılacaq

Bu, iri kənd təsərrüfatlarının yaradılması məqsədilə həyata keçirilir

Bakı. 3 may. REPORT.AZ/ Azərbaycanda iri kənd təsərrüfatlarının yaradılması məqsədilə sahibkarlar üçün müsabiqə təşkil ediləcək. “Report” İqtisadiyyat Nazirliyinə istinadən bildirir ki, sözügedən müsabiqədə kənd təsərrüfatı sahəsində ixtisaslaşmış sahibkarlar iştirak edə bilərlər.

"Azərbaycanda kənd təsərrüfatı məhsullarının istehsalının artırılması hesabına ərzaq təhlükəsizliyinin daha da möhkəmləndirilməsi tədbirləri çərçivəsində Nazirlər Kabinetinin sərəncamına əsasən, “Samur-Abşeron suvarma sisteminin yenidən qurulması Layihəsi" üzrə aidiyyəti dövlət və rayon icra hakimiyyəti orqanlarının nümayəndələrindən ibarət İqtisadiyyat Nazirliyində yaradılan komissiya tərəfindən yeni ərazilərin əkin dövriyyəsinə cəlb olunması, burada iri təsərrüfatların qurulması istiqamətində cari ildə Xızı və Siyəzən rayonlarında meliorativ tədbirlər başa çatdırılan torpaq sahələri təyinatı dəyişdirilərək müsabiqə və hərrac yolu ilə kənd təsərrüfatı məhsulları (bitkiçilik) istehsalı üzrə ixtisaslaşan sahibkarlara uzunmüddətli icarəyə veriləcək", - deyə Nazirliyin xəbərində qeyd olunub.

Bu məqsədlə bu il Xızı rayonunda 4 319,8 ha, o cümlədən 769,2 ha dövlət və 3 550,5 ha bələdiyyə, Siyəzən rayonu üzrə isə 1 333,9 ha bələdiyyə mülkiyyətinə aid torpaq sahəsinin müsabiqəyə çıxarılması nəzərdə tutulur.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Xəbər lenti

Bütün xəbərlər


Orphus sistemi