Azərbaycan ötən il Uraldan 30 ton balıq məhsulları idxal edib

2022-ci ildə Azərbaycan Rusiyanın Ural bölgəsindən 30 tondan çox hazır və ya konservləşdirilmiş balıq məhsulları idxal edib.

“Report” xarici mətbuata istinadən xəbər verir ki, bu barədə Ural Gömrük İdarəsinin məlumatında bildirilib.

Gömrük İdarəsi vurğulayıb ki, Azərbaycan ötən ildən balıq idxalına keçib.

Hesabat dövründə Uraldan ümumilikdə 170 min ABŞ dolları dəyərində 33 ton ət məhsulları göndərilib. Kolbasa və ət məhsullarının, o cümlədən konservləşdirilmiş məhsulların ixrac həcmi çəki ifadəsində 3,7 dəfə (274 %), dəyər ifadəsində isə 386 % artıb. Bir il əvvəl isə ümumilikdə 35 min ABŞ dolları dəyərində 9 ton ixraca göndərilib.

Ötən il bölgədən heyvandarlıq məhsulları əsasən Vyetnam, Azərbaycan, Serbiya və Özbəkistana tədarük edilib.