Azərbaycan Dövlət Aqrar Universitetinə tələbə qəbulu ən yüksək həddə çatıb

Kənd təsərrüfatı naziri İnam Kərimov 2021/2022 tədris ilinin başlanması münasibətilə Azərbaycan Dövlət Aqrar Universitetində (ADAU) tələbələrlə görüşüb.

"Report" bu barədə nazirliyə istinadən xəbər verir.

Məlumata görə, əvvəlcə Azərbaycanın ərazi bütövlüyü uğrunda canlarını qurban vermiş Vətən müharibəsi şəhidlərinin əziz xatirəsi bir dəqiqəlik sükutla yad edilib.

ADAU-nun yeni tədris korpusunda keçirilən görüşdə çıxış edən nazir bildirib ki, Prezident İlham Əliyev aqrar sahənin inkişafını prioritet istiqamətlərdən biri elan edib. Ardıcıl həyata keçirilən tədbirlər nəticəsində aqrar sahə özünün yeni inkişaf mərhələsinə qədəm qoyub və dövlət dəstəyi sayəsində bu sahədə inkişaf tempi davam edir. Kadr potensialının zənginliyi, peşəkar kadrların mövcudluğunu hər bir sahənin inkişafının əsas amillərindən biri adlandıran nazir İnam Kərimov yeni tədris ilində tələbələrə uğurlar arzulayıb.

Tədbirdə çıxış edən Azərbaycan Dövlət Aqrar Universitetinin rektoru İbahim Cəfərov, Türkiyənin Ege Universitetinin professoru İsmail Türkan son illər ADAU-da kənd təsərrüfatı və dövlət sifarişli ixtisaslar üzrə təhsil alanların sayının əhəmiyyətli dərəcədə artmasını təqdirəlayiq hal kimi qiymətləndirib. ADAU-nun maddi-texniki bazasının müasirləşdirilməsi və rəqabətədavamlı kadr hazırlığının təmin edilməsi, eləcə də yeni dərs ilinə hazırlıqla bağlı görülən işlər barədə tədbir iştirakçılarına ətraflı məlumat verilib.

Daha sonra yüksək balla ADAU-ya qəbul olan tələbələrlə, ikili diplom proqamı çərçivəsində Türkiyənin Ege Universitetindən dəvət olunmuş professor-müəllim heyəti, həmçinin ikili diplom proqramı ixtisaslarına qəbul olan tələbələrlə görüş keçirilib. Tədbirdə çıxış edən tələbə və valideynlər aqrar təhsilə göstərdiyi diqqət və qayğıya görə ölkə prezidentinə dərin minnətdarlıqlarını bildiriblər.

Hazırda universitetin 560-dan çox professor-müəllim heyəti 6000-dən çox tələbəyə aqrar elmin dərinliklərini öyrədir. Son illər kənd təsərrüfatı ixtisaslarına qəbulda və keçid ballarının səviyyəsində artım qeydə alınıb. ADAU-nun tarixində ilk dəfə olaraq bu il tələbə qəbulu ən yüksək həddə - 1347 nəfərə çatıb ki, bu da aqrar sahədə təhsilə marağın artdığını göstərir. Universitet dünyanın 26-dan çox ölkəsinin 60-dan artıq universiteti ilə əməkdaşlıq edir. Cari tədris ilindən etibarən Ege Universitetinin aparıcı alimləri universitetdə tədris prosesinə cəlb olunub. Son illər ADAU-nun beynəlxalq əlaqələrinin genişlənməsi nəticəsində universitetdə təhsil alan əcnəbi tələbələrin sayı əhəmiyyətli dərəcədə artıb. Cari tədris ilində universitetə 171 əcnəbi tələbə qəbul olub.

Səfər çərçivəsində nazir İnam Kərimov universitetin Göygöl rayonunda Heyvandarlıq Elmi-Tədqiqat İnstitutu, Süni Mayalanma Mərkəzinə baxış keçirib, iri və xırda buynuzlu heyvandarlıq kompleksləri, eləcə də Arıçılıq Mərkəzində tikinti işlərinin gedişi ilə tanış olub.