Bakı 20° C
https://static.report.az/photo/3b78b2eb-b2c3-385a-80ba-a769bf310802.jpg
Bu gün Bakıda 15-ci Azərbaycan Beynəlxalq Kənd Təsərrüfatı Sərgisi – “Caspian Agro” və 27-ci Azərbaycan Beynəlxalq Qida Sənayesi Sərgisi – “InterFood Azerbaijan” işə başlayıb.
Azərbaycan Respublikası Kənd Təsərrüfatı Nazirliyinin aktiv dəstəyi ilə keçirilən “Caspian Agro 2022” və “InterFood Azerbaijan 2022” sərgiləri Kiçik və Orta Biznesin İnkişafı Agentliyinin (KOBİA) dəstəyi ilə qida sənayesi və kənd təsərrüfatı sahələrində fəaliyyət göstərən mikro və kiçik sahibkarlıq subyektləri öz məhsul və xidmətlərini təqdim edirlər.
Mayın 20-dək davam edəcək sərgidə Kənd Təsərrüfatı Nazirliyinin tabeliyində fəaliyyət göstərən “Azəraqrar Dövlət İstehsalat və Emal Birliyi” Məhdud Məsuliyyətli Cəmiyyəti öz stendi ilə iştirak edir.
Əsas fəaliyyət istiqamətləri bitkiçilik və heyvandarlıq sahələrində kənd təsərrüfatı məhsullarının istehsalı və emal işinin təşkilini nəzərdə tutan "Azəraqrar Dövlət İstehsalat və Emal Birliyi" MMC-nin missiyası dövlətə məxsus resursların müasir təcrübə, innovativ texnika və texnologiyaların tətbiqinə əsaslanaraq maksimal səmərə və effektivliklə istifadə edilməsi yoluyla ölkəmiz üçün yüksək keyfiyyətli kənd təsərrüfatı məhsullarının istehsalına nail olmaq, ətraf mühitin harmoniyasının saxlanması şərtilə əhalinin maddi rifahı və ərzaq təhlükəsizlıiyinin təmin edilməsinə əhəmiyyətli töhfə verərək aqraq iqtisadiyyatın əsas drayverlərindən birinə çevrilməkdir.
Sərgidə 2022-ci ilin mart ayından etibarən müəssisə qeydə alınmış rəsmi əmtəə nişanı olan “Təbio” markası altında emalına başlanmış yüksək keyfiyyətli, biloji saf süd, ət və ət məhsulları, bal nümayiş olunurdu.
Yüksək zövq ilə hazırlanmış stenddə müəssisə tərəfindən emal olunmuş kərə yağı, pendir, xama, qaymaq, ayran, qatıq və digər məhsullar sərgi iştirakçılarının geniş marağına səbəb olub.
Sərgidə Azərbaycanın Baş naziri Əli Əsədov, kənd təsərrüfatı naziri İnam Kərimov, Türkiyənin kənd təsərrüfatı və meşəçilik naziri Vahid Kirişçi, İsrailin kənd təsərrüfatı və kənd yerlərinin inkişafı naziri Oded Foreri, Gürcüstanın ətraf mühit və kənd təsərrüfatı nazirinin müavini George Xanişvili və digər ölkələrin rəsmi şəxsləri “Caspian Agro 2022” və “InterFood Azerbaijan” sərgiləri ilə tanış olub.
Qeyd edək ki, Azərbaycanda kənd təsərrüfatı sahəsində ən böyük beynəlxalq sərgi olan “Caspian Agro”da ümumilikdə 24 ölkədən 449 şirkət iştirak edirdi ki, bunlardan da 101 yerli, 348 xarici şirkətlərdir.
