Bakı 12° C
Bakı. 25 aprel. REPORT.AZ/ Son günlər qlobal maliyyə bazarlarında ABŞ dollarının digər aparıcı dünya valyutaları qarşısında məzənnəsini müəyyən edən dollar indeksi artmaqdadır.
“Report”un analitik qrupu bildirir ki, indeksin gündəlik artımı 2,05% təşkil edib ki, bu da 2016-cı ilin noyabr ayından bəri rekord həddir.
Göründüyü kimi bəzi investorların dollar dövrünün başa çatması barədə fikirlərinə baxmayaraq, Amerika valyutası bahalaşmaqda, ona maraq artmaqdadır. Bu isə həm iqtisadi, həm də texniki amillərlə bağlıdır.
İlk növbədə, investorlar ABŞ və digər ölkələrin istiqrazlarının illik faiz dərəcəsi arasındakı fərqə biganə qala bilmirlər. ABŞ-ın 10 illik xəzinə notlarının illik gəlirliliyinin 3%-ə yaxınlaşması digər ölkələrin qiymətli kağızlarından imtina ilə nəticələnir və avtomatik olaraq dolları bahalaşdırır.
Amerika puluna tələbatı artıran həm də dünyanın ən böyük iqtisadiyyatında baş verən inflyasiya yönümlü yeniliklərdir. Son vaxtlar ABŞ-da istehlak qiymətləri indeksi artıb. Bu isə investorlarda belə bir fikir formalaşdırıb ki, Federal Ehtiyat Sistemi uçot dərəcəsini artıracaq. Bu, reallaşsa, dolların daha da bahalaşması qaçılmaz olacaq.
Digər tərəfdən, bu həftə Avropa və Yaponiya Mərkəzi Banklarının uçot dərəcəsi ilə qərarlarını açıqlayacaqları gözlənilir. İnvestorlar hesab edir ki, hər iki qurumun qərarında yenilik olmayacaq, yəni faizlər sabit saxlanılacaq. Çünki həm Avropada, həm də Yaponiyada qiymətlərin azalması müşahidə olunur. Bu isə dollarla investisiyaları daha gəlirli etdiyindən Amerika valyutası üçün müsbət xəbər hesab olunur.
