Barak Obama: "İŞİD-in məhvi bizim üçün böyük əhəmiyyət kəsb edir"

Bakı. 23 aprel. REPORT.AZ/ İŞİD və "əl-Qaidə" kimi qruplaşmaların terrorçuları Qərb üçün ən ciddi təhlükədir.

"Report" TASS-a istinadən xəbər verir ki, bu barədə fikri ABŞ prezidenti Barak Obama Almaniyaya səfəri (24-25 aprel) ərəfəsində "Bild" qəzetinə verdiyi müsahibədə deyib.

"İŞİD və "əl-Qaidə" kimi qruplaşmaların terrorçuları mübarizə apardığımız ən ciddi təhlükədir. Onlarla mübarizə bir neçə səbəbdən çətindir. Mənim üçün İŞİD-in məhvi böyük əhəmiyyət kəsb edir", - deyə B.Obama bildirib.

ABŞ prezidenti həm Suriyada, həm də İraqda İŞİD terrorçularının geri çəkildiklərini qeyd edib: "Artıq onların nəzarət etdiyi torpaqların ərazisi azalıb".

"Bununla belə, Paris və Brüsseldə baş vermiş terror hücumları göstərdi ki, belə hücumların qarşısını almaq üçün daha çox səy göstərməliyik", - deyə ABŞ prezidenti vurğulayıb.