Qazaxıstan dövlət katibi: "Dəstəyə görə Azərbaycana minnətdarıq"

Bakı. 30 sentyabr. REPORT.AZ/ "Bu gün Qazaxıstanda təxminən 10 min azərbaycanlı yaşayır və 16 müxtəlif Azərbaycan mərkəzi fəaliyyət göstərir. Qazaxıstanda azərbaycanlıların öz mədəniyyəti və ənənələrini qoruyub saxlaya bilməsi üçün hər cür şərait yaradılıb".

"Report" xəbər verir ki, bunu Bakıda "Azərbaycan-Qazaxıstan" Dostluq Cəmiyyətinin üzvləri ilə görüşdə Qazaxıstanın dövlət katibi Gulşara Abdıkalikova deyib.

İkitərəfli münasibətlərdən danışan G.Abdıkalikova Azərbaycan və Qazaxıstanın TürkPA, TÜRKSOY, ATƏT və BMT kimi müxtəlif beynəlxalq təşkilatlarda məhsuldar əməkdaşlıq etdiyini bildirib.

"Qazaxıstan 2017-2018-ci illər üzrə BMT Təhlükəsizlik Şurasının qeyri-daimi üzvü seçilib. Azərbaycan bizi bütün səviyyələrdə dəstəkləyib, buna görə də Azərbaycan rəhbərliyinə və xalqına təşəkkür edirik", - deyə o qeyd edib.

Öz növbəsində, Qazaxıstanın Azərbaycandakı səfiri Beybit İsabayev görüşdə çıxış edərək Azərbaycan və Qazaxıstanın bu gün beynəlxalq ictimaiyyətin hörmətli üzvləri olduğunu bildirib. "Bir çox şeyləri sıfırdan etmişik. Fəxrlə deyə bilərik ki, bu gün Azərbaycan və Qazaxıstanla hesablaşırlar. Böhrana baxmayaraq, bu problemi aradan qaldıracağımıza və müstəqilliyimizin 25-ci ildönümünü layiqli şəkildə qeyd edəcəyimizə əminəm", - deyə o vurğulayıb.

Görüşün sonunda Azərbaycan-Qazaxıstan əlaqələrinin inkişafında göstərdiyi xidmətlərə görə, G.Abdıkalikova "Azərbaycan-Qazaxıstan" Dostluq Cəmiyyəti tərəfindən fəxri diplomla təltif edilib.