Çin Azərbaycanın təklif etdiyi sülh gündəliyini qətiyyətlə dəstəkləyir

Çin Azərbaycanın təklif etdiyi sülh gündəliyini qətiyyətlə dəstəkləyir və qarşıdurmaya yönəlmiş geosiyasi oyunları qeyri-məhsuldar hesab edir.

“Report”un Pekinə ezam olunmuş əməkdaşının məlumatına görə, bu barədə Azərbaycan Prezidenti İlham Əliyev və Çin Sədri Si Cinpinin aprelin 23-də keçirilən danışıqların yekunlarına dair birgə bəyanatında bildirilib.

"Tərəflər xalqlarının seçdiyi və milli şərtlərə uyğun olan inkişaf yolunu seçməkdə bir-birini möhkəm dəstəkləyir, hər iki ölkənin təməl maraqlarının, suverenliyinin, təhlükəsizliyinin və ərazi bütövlüyünün qorunmasında bir-birinə qətiyyətli dəstək verirlər”, - sənəddə qeyd olunub.

Bəyanatda qeyd edilib ki, Azərbaycan tərəfi dünyada yalnız vahid bir Çinin mövcudluğunu, Tayvanın Çin ərazisinin ayrılmaz tərkib hissəsi olduğunu, Çin Xalq Respublikası hökumətinin bütün Çini təmsil edən yeganə qanuni hökumət olduğunu tanıyır: 

“Azərbaycan tərəfi "Tayvanın müstəqilliyi”nin istənilən formasına qarşı qətiyyətlə çıxır və ölkənin yenidən birləşməsinin həyata keçirilməsində Çin hökumətini dəstəkləyir.