Belarus səfiri: Ermənistanın AİB-ə daxil olması Azərbaycanın maraqlarında əks olunmayacaq

Bakı. 17 dekabr. REPORT.AZ/ "Belarusun Avrasiya İqtisadi Birliyinə daxil olması yalnız ölkə üçün deyil, həm də onun tərəfdaşları, o cümlədən Azərbaycan üçün yeni imkanlar yaradacaq". "Report" xəbər verir ki, bu barədə Belarusun Azərbaycandakı səfiri Nikolay Patskeviç mətbuat konfransında bildirib. 

"Biz bu ittifaqın gələcəyinə, o cümlədən Azərbaycanla tərəfdaşlıq baxımından pozitiv baxırıq. Bundan başqa, digər tərəflər də AİB ilə əməkdaşlıqda maraqlıdır", - N.Patskeviç qeyd edib. 

O, həmçinin vurğulayıb ki, Ermənistanın AİB-ə daxil olması Azərbaycanla münasibətlərə təsir etməyəcək. "Burada mən heç nə əlavə edə bilmərəm. Bizim bu məsələ ilə bağlı mövqeyimiz dəyişməzdir. Həmin mövqeni Belarus prezidenti bildirib. Ermənistanın AİB-ə daxil olması bütün prosedurların yerinə yetirilməsindən sonra mümkündür. Bu məsələ Azərbaycanın maraqlarında əks olunmayacaq", - səfir bildirib.