Azərbaycan və Qırğız Respublikası investisiya əməkdaşlığını intensivləşdirir

Azərbaycan və Qırğız Respublikası birgə dialoqun intensivləşdirilməsi, habelə gələcək ticari-iqtisadi və investisiya əməkdaşlığının inkişaf etdirilməsinə dair razılığa gəlib.

“Report” “Tazabek” agentliyinə istinadən xəbər verir ki, razılıq Qırğız Respublikasının investisiyalar naziri Nuradil Bayasovun Azərbaycan iqtisadiyyat nazirinin müavini Niyazi Səfərovun başçılıq etdiyi ekspert qrupu ilə görüşü zamanı əldə olunub.

Tərəflər həmçinin investisiya layihələrinin birgə işlənməsinin və birgə müəssisələrin yaradılmasının xüsusi rolunu qeyd ediblər.

N.Bayasovun sözlərinə görə, Qırğız Respublikası Azərbaycan ilə hərtərəfli münasibətlərin inkişafına xüsusi diqqət yetirir və bu münasibətlər qarşılıqlı etimada, həmçinin ikitərəfli əlaqələrin dərinləşdirilməsinə, inkişafına, qarşılıqlı marağa əsaslanır.

Azərbaycan nümayəndə heyəti istehsal potensialı və inkişaf təcrübəsi ilə tanış olmaq üçün “Bişkek” Azad İqtisadi Zonasına səfər edib, həmçinin dövlət orqanlarının və biznes strukturların nümayəndələri ilə bir sıra görüşlər keçirib.