Yuxarı
    Bağlamaq

    Azərbaycan müsəlman turistlər üçün ən yaxşı istiqamətlər siyahısında yer alıb

    İƏT-ə üzv olmayan ölkələrdən isə Sinqapur birinci olub

    Bakı. 6 sentyabr. REPORT.AZ/ “MasterCard” və “Crescent Rating” təşkilatları müsəlman turistlərin səyahət istiqamətləri və tələblərini araşdıran "Müsəlmanların Qlobal Səyahət İndeksi (GMTI) 2016" hesabatını dərc edib. “Report” xəbər verir ki, hesabata əsasən, Malayziya, BƏƏ və Türkiyə ən yüksək indeks göstəricilərinə malik olmaqla müsəlman turistlər üçün ən məşhur istiqamətlər siyahısında ilk sıralarda yer alıb. Ümumilikdə, 130 turizm istiqamətini əhatə edən araşdırma nəticəsində İslam Əməkdaşlıq Təşkilatı (İƏT) ölkələri sırasında Azərbaycan 20-ci yerdə qərarlaşıb.

    Ötən ilin hesabatı ilə müqayisədə BƏƏ bir pillə irəliləyərək İƏT istiqamətləri siyahısında ikinci yerə sahib çıxıb. Fars körfəzi ölkələrinin əməkdaşlıq şurasının digər üzvləri olan Qətər, Səudiyyə Ərəbistanı, Oman və Bəhreyn də ilk onluqda yer alıb. Siyahıda liderliyi Malayziya qoruyub saxlayıb.

    İƏT-ə üzv olmayan ölkələrdən isə Sinqapur birinci olub. Növbəti sıralarda Tayland, Böyük Britaniya, CAR və Honkonq qərarlaşıb.

    Bununla yanaşı, araşdırmanın nəticələrinə əsasən, 2015-ci ildə qlobal olaraq orta hesabla 117 mln. müsəlman turist qeydə alınıb ki, bu da ümumilikdə turizm bazarının 10%-ni təşkil edir. Sözügedən göstəricinin 2020-ci ilədək 168 mln. nəfərə və ya ümumi turist axınının 11%-nə çatacağı gözlənilir. Qeyd olunan tarix üçün müsəlman turistlərin xərclərinin 200 mlrd. ABŞ dollarını üstələyəcəyi proqnozlaşdırılır.

    Asiya və Avropa ölkələri ümumilikdə müsəlman turist axınının 87%-ni qəbul etməklə müsəlman turistləri cəlb edən əsas iki region olub.

    Sürətlə inkişaf edən bu sektor üzrə ən geniş araşdırmanın nəticələrinə əsasən, təqdim olunmuş hesabatda Orta Şərq və Afrika regionundan 8 ölkə müsəlman turistləri üçün ən yaxşı səyahət istiqamətlərinin ilk onluğunda yer alıb.

    “Orta Şərq və Afrika regionundan olan 8 ölkənin “MasterCard” və “Crescent Rating”in təqdim etdiyi yeni hesabatda yüksək sıralarda yer alması bizi sevindirir. Bu göstəricilər regionun inkişafı və sürətlə böyüməkdə olan müsəlman turist bazarının tələblərinə köklənməsini vurğulayır. Bu da məqsədəuyğun bir addımdır. Belə ki, məhz müsəlman turist sektoru uzunmüddətli dayanıqlı iqtisadi inkişafın aparıcı qüvvələrindən birinə çevrilməkdədir”, - deyə “MasterCard”ın Orta Şərq və Afrika regionu üzrə prezidenti Raqu Malhotra (Raghu Malhotra) bildirib.

    GMTI 130 turizm istiqamətini dünyanın ən sürətlə inkişaf edən turizm sektoru üzrə müfəssəl təhlilini həyata keçirən və bu sahədə dolğun məlumat təqdim edən bir araşdırmadır. Bu indeks turizm məkanlarına, səyahət xidmətlərinə və investorlara müsəlman turizm sektorunun inkişafı və dəyişikliklərini izləməyə imkan verən bir göstəricidir.

    Məlumata görə, 130 turizm istiqamətinin hər biri GMTI-də ailəvi istirahətin uyğunluğu, xidmət səviyyəsi, təklif olunan imkanlar və seçimlər, marketinq təşəbbüsləri və turist axını kimi meyarlara əsasən qiymətləndirilir. Bu ildən etibarən daha iki meyar – hava nəqliyyatı və vizanın alınması ilə bağlı əməliyyatlar da nəzərdən keçirilir. Bu keyfiyyətlər ümumilikdə qiymətləndirilərək hər bir təyinat nöqtəsi üçün vahid indeks tərtib olunur.

    1. "GMTI 2016" indeksinin İƏT-ə daxil olan Top-20 istiqaməti
    2.   
      YER
      GMTI 2016 indeksində mövqe
      İstiqamət 
      Göstərici 
      1
      1
      Malayziya
      81.9
      2
      2
      BƏƏ
      74.7
      3
      3
      Türkiyə
      73.9
      4
      4
      İndoneziya
      70.6
      5
      5
      Qətər
      70.5
      6
      6
      Səudiyyə Ərəbistanı
      70.4
      7
      7
      Oman
      70.3
      8
      9
      Mərakeş
      68.3
      9
      10
      İordaniya
      65.4
      10
      11
      Bəhreyn
      65.3
      11
      12
      Bruney
      64.6
      12
      13
      Küveyt
      64.1
      13
      14
      Tunis
      63.7
      14
      15
      İran
      63.6
      15
      16
      Qazaxıstan
      63.3
      16
      17
      Misir
      63.1
      17
      18
      Maldiv
      61.8
      18
      19
      Banqladeş
      60.0
      19
      22
      Əlcəzair
      58.5
      20
      23
      Azərbaycan
      57.3




    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi