Bakı. 20 noyabr. REPORT.AZ/ "Azərbaycan dövləti uşaqların daha yaxşı və hərtərəfli inkişafı üçün lazım olan bütün imkanları yaradır".
"Report" xəbər verir ki, bunu Azərbaycan Uşaqlarının IV Ümumrespublika Forumunda Ailə, Qadın və Uşaq Problemləri üzrə Dövlət Komitəsinin sədri Hicran Hüseynova deyib.
O bildirib ki, Azərbaycan iqtisadiyyatı dağılmış ölkədən güclü, davamlı inkişaf edən dövlətə çevrilib: "Bu yüksəliş təkcə iqtisadi, neft, qaz və energetika sahəsində deyil, elm, idman, mədəniyyət, sosial və digər sahələrdə baş verib. İki telekommunikasiya peykimiz orbitə çıxarılıb. Artıq Azərbaycan Avrasiya məkanının nəqliyyat mərkəzlərinin birinə çevrilməkdədir. Əlbəttə, bir məsələni unutmaq olmaz ki, bütün bu uğurlar təkcə Ermənistanla davam edən müharibə və onun törətdiyi ağır fəsadların deyil, həm də bizə qarşı aparılan riyakar və ədalətsiz siyasətin fonunda həyata keçirilir. Belə bir çətin şəraitdə yetişməkdə olan gənc nəslimiz vətənpərvərlik ruhunda, milli ruhda tərbiyə edilməlidir. Eyni zamanda, günü-gündən güclənən dövlətimizə yüksək ixtisaslı kadrlar, peşəkar mütəxəssislər lazımdır. Vətəni təkcə fiziki güclə deyil, həm də elmlə, savadla qorumaq, möhkəmləndirmək lazımdır".
Dövlət Komitəsinin sədri qeyd edib ki, uşaqların hüquqlarının müdafiəsi valideynlərlə yanaşı, dövlətin də qarşısında duran əsas məqsəddir: "Hər bir sənəddə, qanunvericilik aktlarında uşaq problemləri öz əksini tapıb. 2016-2030-cu illər üçün Dayanıqlı İnkişaf Məqsədlərində uşaqların daha yaxşı təhsil almağı, sağlam böyüməyi, rahat şəraitdə, təmiz mühitdə yaşamağı və digər məsələlərlə bağlı bir çox məqsəd və hədəflər göstərilib".