Yuxarı

İstanbulda cənubi azərbaycanlı rəssamın fərdi sərgisi açılıb

​İstanbulda cənubi azərbaycanlı rəssamın fərdi sərgisi açılıb 22477

Bakı. 10 fevral. REPORT.AZ/ Türkiyənin İstanbul şəhərində doktorantura təhsili alan cənubi azərbaycanlı miniatür sənətkarı Səba Cəfəri Bağımsız sənət vəqfinin qalareyasında fərdi sərgi açıb.

“Report” xəbər verir ki, sərgidə onun suluboya və akrilik boya ilə çəkdiyi kiçik, orta və irihəcmli 30 miniatürü nümayiş etdirilir.

Açılış mərasimində çıxış edən sərginin kuratoru Hülya Yazıcı deyib ki, Səba Cəfəri öz sənətiylə zəngin tarixi keçmişi olan miniatür sənətini gələcəyə daşıyan nadir sənətkarlardandır. Səba Cəfərinin atası, Cənubi Azərbaycanın məşhur şairi Huşəng Cəfəri isə açılış mərasimindəki çıxışında biri şair, o biri rəssam olan iki qızının onun ideallarını yaşadacağından əmin olduğunu vurğulayıb. Huşəng Cəfəri qızının fərdi sərgisinin açılış mərasimində özünün bir neçə şeirini oxuyub.

İran Azərbaycanının Zəncan şəhərində anadan olan Səba Cəfəri qrafika sənəti sahəsində ali təhsilini orada alandan sonra İstanbuldakı Memar Sinan incəsənət universitetində magistratura təhsilini başa vurub.Yaradıcılıq işlərini İstanbulda davam etdirən Səba Cəfəri, xalq yaradıcılığı nümunələrində miniatürlərin izlərinə dair doktorluq dissertasiyası yazır.

Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

Tərəfdaşların xəbərləri


Xəbər lenti

Son xəbərlər



Orphus sistemi