İqtisadiyyat naziri: "Xudafərin kəndi erməni acgözlüyünün qurbanı olub"

Sənaye

Yeniliklərdən dərhal xəbərdar olun!

Bakı. 25 fevral.REPORT.AZ/ "İrana səfər çərçivəsində İran tərəfi ilə birlikdə Araz çayı üzərində reallaşdırılan "Xudafərin" və "Qız Qalası" layihəsinin icrası ilə tanış olarkən erməni vandalizminin, vəhşiliyinin bir daha şahidi oldum. Azərbaycanın Xudafərin kəndi ermənilər tərəfindən tamamilə dağıdılıb, evlər yerlə yeksan edilib, infrastruktur tamamilə məhv edilib. Dəmir yolu xətləri belə erməni acgözlüyünün qurbanı olub, reyslər və şpallar sökülərək daşınıb". "Report" xəbər verir ki, bunu Azərbaycanın iqtisadiyyat naziri Şahin Mustafayev Azərbaycan-İran iqtisadi əlaqələrinə dair keçirdiyi mətbuat konfransında bildirib.

Ş.Mustafayev deyib ki, artıq Azərbaycan torpaqlarının işğaldan azad edilməsi istiqamətində ən ciddi addımlar atılır: "Xudafərin" və "Qız qalası" layihəsinin Azərbaycanın işğal olunmuş ərazilərində icrasına başlanılması da bunu bir daha sübut edir. İşğaldan azad edilmiş Cocuq Mərcanlıda Prezident İlham Əliyevin tapşırığı ilə bərpa və geniş quruculuq işlərinə başlanılıb.

“Xudafərin” və “Qız qalası” layihəsi Azərbaycan Prezidenti İlham Əliyevin və İran Prezidenti Həsən Ruhaninin siyasi iradəsinin, ölkələr arasında strateji əməkdaşlıq səviyyəsinə yüksəlmiş əlaqələrin təzahürüdür", - deyə nazir əlavə edib.

İqtisadiyyat Nazirliyinin yaydığı məlumatda bildirilib ki, 2017-ci ilin yanvarında Azərbaycan Prezidenti tərəfindən 36 MVt gücündə Ordubad SES-in təməli qoyulub: "Xudafərin" və "Qız Qalası" layihəsinin böyük siyasi və iqtisadi əhəmiyyəti var. Bu, Azərbaycana layihənin idarəetməsində fəal iştiraka və suvarmaya böyük imkan yaradacaq. Layihə çərçivəsində tikilmiş bəndin hündürlüyü 64 metr, uzunluğu 400 metr. su tutumu 1,6 mlrd. kubmetrdir. "Xudafərin" və "Qız Qalası" Sazişində hər iki ölkənin suverenliyi və ərazi bütövlüyünə hörmət prinsipləri bəyan edilir, BMT qətnamələrinə uyğun olaraq Azərbaycanın ərazi bütövlüyünün bərpa edilməsinin zəruriliyi, hər iki tərəfin su və enerji ehtiyatlarına bərabər hüquqları vurğulanır. Bu layihə bir daha göstərir ki, işğalçı Ermənistanın səylərinə baxmayaraq beynəlxalq hüquq və haqq-ədalət Azərbaycanın tərəfindədir. Bu ərazilərin işğal altında olmasına baxmayaraq, Azərbaycan iqtisadi fəaliyyət göstərir. Ermənistanın işğalçı siyasəti heç bir nəticə vermir və bu ərazilər üzərində Azərbaycan öz suveren hüquqlarını həyata keçirir".