Azərbaycanda neft sektoruna sərmayələr 12% artıb

Bakı. 18 aprel. REPORT.AZ/ Bu ilin yanvar-mart aylarında Azərbaycan iqtisadiyyatının neft bölməsinə 1 529,8 mln. manat həcmində vəsait yönəldilib. Bu da ötən ilin eyni dövrü ilə müqayisədə 11,7% çoxdur.

"Report"un Dövlət Statistika Komitəsinə istinadən verdiyi xəbərə görə, bu müddətdə qeyri-neft sektoruna investisiyalarda isə 3,04% azalma qeydə alınıb.

Qeyri-neft bölməsinin inkişafına sərf edilmiş 1 703,0 mln. manatlıq vəsaitin 154,4 mln. manatı (ümumi sərmayənin 4,8%-i) qeyri-neft sənaye bölməsinin inkişafında istifadə edilib. Qeyri-neft sektoruna yönəldilmiş vəsaitin 50,3%-i qeyri-dövlət müəssisə və təşkilatlarının payına düşüb.