İnsan embrionunda ilk dəfə beta-talassemiyanın inkişafına səbəb olan DNT mutasiyasının korreksiyası həyata keçirilib

Bakı. 28 sentyabr. REPORT.AZ/ Alimlər genetik xəstəliyi müalicə etmək məqsədilə ilk dəfə insan embrionunun yüksək dəqiqliklə kimyəvi əməliyyatını həyata keçirib.

"Report" BBC-yə istinadən xəbər verir ki, bu barədə çinli tədqiqatçılar bildiriblər.

Sun Yatsen Universitetindən olan bir qrup alim üç milyard "işarədən" ibarət olan genetik kodda tək-tük səhvləri düzəltmək üçün istifadə olunan və "əsasların redaktəsi" adı verilən texnologiyadan yararlanıb.

Alimlər laboratoriyada yetişdirilən və DNT-lərində hemoqlobin sintezini pozan ağır genetik xəstəliyin - beta-talassemiyanın inkişafına səbəb olan mutasiyaya uğramış embrionlar üzərində əməliyyat aparıblar.

Alimlər iddia edirlər ki, yeni texnologiya haçansa uşaqlar hələ anadan olmamış bu və digər irsi xəstəlikləri müalicə etməyə imkan verəcək.