Yuxarı
    Bağlamaq

    Azərbaycanda ana ölümlərinin əsas səbəbi açıqlanıb

    Baş mama-ginekoloq: Bəzən hamilələrin ailəsi və qohumları onun vaxtında həkimə müraciət etməsinə yardımçı olmurlar

    Bakı. 21 fevral. REPORT.AZ/ “Azərbaycanda da bütün dünyada olduğu kimi ana ölümlərinin əsas səbəbləri sırasında ağır formalı preklamsiya üstünlük təşkil edir”.

    “Report” xəbər verir ki, bunu Səhiyyə Nazirliyinin Doğuşayardım Komissiyasının sədri, Respublika Perinatal Mərkəzinin baş həkimi, baş mama-ginekoloq Sevinc Məmmədova jurnalistlərə deyib.

    Onun sözlərinə görə, çox vaxt qadınlarda preklamsiya (ağır hamiləliyin fəsadlaşması) müşahidə olunur: “Bu zaman onlarda təzyiq yüksək olur, sidikdə zülal və bədəndə ödəm (şişlər) olur. Bu, əksər vaxtlarda qadınlarda hamiləliyin ikinci yarısından, yəni 22-24-cü həftəsindən başlayaraq özünü gizli şəkildə büruzə vermiş olur. Əlamətlər daxildən başlayır, qadın ağırlaşır, yuxusu gəlir, əli ayağı şişir”.

    Baş mama-ginekoloq bildirib ki, bəzən hamilələrin ailəsi və qohumları onun vaxtında həkimə müraciət etməsinə yardımçı olmurlar: "Onlara ana və nənəsini misal göstərirlər. Amma bu problemlər hamilə qadının həm bətnində olan dölü inkişafdan saxlayır, həm də onun özünə ciddi ziyan vurur, yəni qaraciyərində, böyrəyində, damarlarında, göz dibində, beyinində dəyişikliklər meydana çıxır. Həmin qadınlar ağırlaşmış formada xəstəxanaya daxil olanda yalnız təxirəsalınmaz halda onlara yardım edə bilirik”.

    S.Məmədova qeyd edib ki, əgər hamilə qadının qız vaxtı sağlamlığı normal və heç bir ekstragenital xəstəliyi olmayıbsa, bu zaman qadın məsləhətxanasına 7 dəfə müraciət edilməlidir: “Təəssüf ki, bəzən qadınlar və qızlar öz xəstəlikləri barədə anlayışlı olmurlar. Həkimə hamilə qalandan sonra gec müraciət edirlər. Nəticədə bir sıra xəstəliklər hamiləlik vaxtı kəskinləşir. Bu zaman həkimə müraciət etdikdə isə ona yardım göstərmək üçün vaxt məhdudlaşır. Lakin o da məlumdur ki, heç bir qadının sağlamlığı ideal formada deyil və hər birinin qız vaxtından qalan problemləri var”.

    “Əgər qadın məsləhətxanasında həkim-ginekoloq hamiləyə bir neçə dəfə gəlməyi məsləhət görürsə, onda buna riayət etmək lazımdır. Çox vaxt hər hansı bir gizlin keçən xəstəlik barədə şübhə edirik. Təbii ki, dəqiq diaqnoz qoymaq üçün müəyyən vaxt (3 gün, 1 həftə və ya 10 gün) lazım olur. Çox vaxt hamilələr bunu unutduğundan təyin edilən təkrar müayinələrə gəlmirlər. Təkrar müayinələr hamil qadının bədənində baş verən dəyişikliklər barədə ilkin diaqnostika üçün vacib addımdır”, - deyə baş mama-ginekoloq vurğulayıb.

    Mətndə orfoqrafik səhv aşkar etdinizsə, səhv olan hissəni qeyd edib Ctrl + Enter düymələrini sıxın.

    Xəbər lenti

    Ən azı bir bölmə seçilməlidir

    Bütün xəbərlər


    Orphus sistemi