Qətərin Səhiyyə Nazirliyi Azərbaycan Tibb Universitetindən yardım istəyib

Sağlamlıq

Yeniliklərdən dərhal xəbərdar olun!

Bakı. 11 sentyabr. REPORT.AZ/ Azərbaycan Tibb Universiteti Qətərin Səhiyyə Nazirliyi ilə əməkdaşlığa başlayır. Universitetdən Report-a verilən məlumatına görə, Azərbaycanda səfərdə olan Qətərin Səhiyyə Nazirliyinin nümayəndə heyəti bu gün Tibb Universitetinin rektoru, akademik Əhliman Əmiraslanovla görüş keçirib.
Görüş zamanı akademik Ə.Əmiraslanov qonaqlara ATU-nun fəaliyyəti, klinikaları, təhsil pillələri və s. haqqında geniş məlumat verdi.
Qətər dövlətinin Səhiyyə Nazirliyinin təmsilçiləri də ölkələrində tibb təhsilinin səviyyəsi haqqında məlumat veriblər. Nazir mavini Faleh Mohamed Hussain Ali bildirib ki, Qətərdə ali tibb təhsili verən müəssisə yoxdur: “Qətərdə yalnız tibb kolleci var. Biz bu sahədə ayrıca universitet yaratmaq istəyirik və bu məsələdə sizin məsləhətinizə ehtiyacımız var”.
ATU rektoru bu məsələdə Qətər tərəfinə yardımçı olacaqlarını bildirib. Gələcəkdə ATU və Qətərin Səhiyyə Nazirliyi arasında qarşılıqlı əməkdaşlıq üçün müqavilənin imzalanacağına dair ilkin razılıq da əldə olunub.
Səfər çərçivəsində Qətərin Səhiyyə Nazirliyinin nümayəndə heyəti Azərbaycan Tibb Universitetinin klinikalarına da gedərək, bu müəssisələrin fəaliyyəti ilə tanış olub.